Akalla mutane 49 sun mutu, yayin da wasu 182 ke kwance a asibitoci bayan zargin shan wata giya a jihar Ondo da ke kudu maso yammacin Nijeriya, kamar yadda kwamishinan lafiya na jihar ya bayyana.

An fara bayar da rahoton wannan matsalar lafiya ta gaggawar a ranar 5 ga Satumba, lokacin da hukumomi suka ce mutane 29 sun mutu cikin mako guda bayan shan barasar da ake zargin ta gurɓace. Kwamishinan Lafiya na Jihar Ondo, Banji Ajaka, ya ce zuwa ranar Jumma’a adadin wadanda suka mutu ya karu zuwa 49.

Hukumomin Jihar Ondo na zargin cewa gubar methanol ce ta haddasa mutuwar mutanen, daga wata giya da ake hadawa a gargajiyance wadda aka fi sani da “Monkey Tail”. Lamarin ya sake nuna haɗarin shaye-shayen barasa marasa ingantaccen tsari, waɗanda ake yawan amfani da su a wasu sassan Nijeriya saboda arha da sauƙin samuwa.

“Yanayin rashin lafiyar da kuma bayanan da aka samu kan yadda mutanen suka sha abin ya haifar da babbar zargin cewa sun sha wani sinadari mai guba da ke cikin barasar. Sai dai har yanzu ba mu samu shaidar ɗakin gwaje-gwaje ba,” in ji Ajaka a cikin wata sanarwa.

Ya ce wadanda abin ya shafa sun nuna alamomi da suka haɗa da ciwon kai, ciwon jiki, wahalar numfashi, fita daga hayyaci, da kuma makanta.

“Wannan abu ya faru cikin gaggawa. Da zarar sun sha, gwargwadon yawan abin da suka sha, ƙoda na iya daina aiki, idanu su makance, sannan kwakwalwa ta lalace,” in ji Ajaka.

Methanol wani nau’in barasa ne mai matuƙar guba wanda zai iya haddasa mummunar illa, makanta, lalacewar gabobin jiki da kuma mutuwa idan aka sha.

Rundunar ‘yansanda ta ce ta kama wani mutum da ake zargi da hannu a lamarin, yayin da hukumomi ke ci gaba da bincike domin gano tushen barasar da ake zargin ta gurɓace.

Har yanzu hukumomi ba su tabbatar ta hanyar gwajin dakin gwaje-gwaje cewa methanol ce ta haddasa mutuwar mutanen ba.