Donald Trump ya yi barazanar shigar da ƙara a kotu a ranar Litinin kan mai gabatarwa na Gasar Grammy ta 68 saboda maganganun barkwanci da suka ambaci shugaban Amurka da wanda aka tabbatar da laifin cin zarafin ta hanyar lalata, Jeffrey Epstein.
Bayan ya taya Billie Eilish murna kan lashe Grammy na Waka ta Shekara da wakarta "Wildflower", mai masaukin baki daga Afirka ta Kudu, Trevor Noah, ya ambaci Trump da Epstein.
"Kai! Wannan Grammy ce da kowanne mawaƙi ke so — kusan kamar yadda Trump yake son Greenland," inda ya yi barkwanci, yana nuni da barazanar shugaban na ƙwace yankin Arctic mai cin gashin kansa.
Noah ya kara da cewa: "Wannan yana da ma'ana domin, sakamakon Epstein bai nan, yana bukatar sabon tsibiri da zai shaƙata tare da Bill Clinton."
Noah, wanda ya sanar cewa wannan shekarar za ta kasance shekarar ƙarshe da zai gabatar da Grammys bayan sau shida a matsayin mai gabatarwa, ya kasance mai takaitaccen tsokaci kan siyasa a shekarun baya.
Martanin Trump
Maganganun sun fusata shugaban, wanda ya fara bayyana a dandalin Truth Social dinsa inda ya ce "Gasar ta Grammy Awards ita ce MAFI MUNI kuma wadda ba ta kalluwa," kafin ya soki Noah.
"Ba zan iya magana a madadin Bill ba, amma ban taɓa zuwa Tsibirin Epstein ba, ko wani wuri kusa da shi, kuma har zuwa wannan ikirarin ƙarya da zargi na daren yau, ba a taba zargina da kasancewa a can ba," in ji Trump.
Trump ya ƙara da cewa Noah na bukatar "ya daidaita bayanansa."
"Zan tura lauyoyina ... Ka shirya Noah, zan yi nishadi da kai!" kamar yadda Trump ya kara cewa.
An saki fiye da takardu miliyan uku a ranar Jumma'a da suka ambaci mutane masu karfi da dama, ciki har da shugaban da yake da shekaru 79, Elon Musk, Bill Gates, Bill Clinton da tsohon Yarima Andrew Mountbatten-Windsor.
