Dakarun rundunar haɗin gwiwa ta yankin Arewa maso Gabas Operation HADIN KAI sun dakile wani harin haɗin gwiwa da mayaƙan ISWAP suka kai hedikwatar Brigade ta 27 da kuma shingen bincike na Buni Gari a Jihar Yobe, inda aka kashe aƙalla ‘yanta’adda 50 a yayin artabun.

Harin ya faru ne da sanyin safiyar Alhamis, 8 ga watan Mayun 2026, lokacin da ‘yanta’addan suka kai farmaki daga sassa daban-daban a cikin duhun dare.

A cikin wata sanarwa da Jami’in Yaɗa Labarai na Operation HADIN KAI, Laftanar Kanal Sani Uba ya fitar, ya ce ‘yanta’addan sun fara kai hari daga ɓangaren yamma kafin su ƙara tura mayaƙa daga kudanci ta hanyar Ganinga Junction sannan daga kudu maso yamma domin kewaye dakarun.

Sai dai ya ce dakarun sun tsaya tsayin daka tare da mayar da martani da manyan makamai da dabarun yaƙi da suka tilasta wa maharan ja da baya cikin ruɗani.

Operation HADIN KAI ta kuma tabbatar da rasuwar sojoji biyu a yayin artabun, inda ta bayyana su a matsayin jarumai da suka sadaukar da rayuwarsu wajen kare ƙasa.

Sojojin sun ce an gano gawarwakin ‘yanta’adda guda 10 a kusa da sansanin, yayin da rahotannin sirri suka nuna cewa an gano fiye da gawarwaki 20 a hanyoyin da suka bi wajen tserewa ta yankunan Gashua, Azare da Kamuya.

Rundunar sojin sama ta OPHK ma ta kai hare-haren sama kan ‘yanta’addan da ke guduwa, inda ta kashe kusan mayaƙa 20.

Kayayyakin da aka ƙwato sun haɗa da bindigogi ƙirar AK-47 guda takwas, bindigogin GPMG guda biyu, roka guda biyu, bama-baman RPG, jigidar harsasai, da kuma kwalaben na’urorin tayar da bama-bamai na IED guda uku.

Sojojin sun kuma bayyana cewa wasu motocin kariya daga hare-haren bama-bamai na MRAP da motocin yaƙi sun lalace yayin musayar wuta, yayin da jami’an da suka jikkata ke samun kulawar lafiya kuma suna cikin yanayi mai kyau.

Rundunar ta ƙara da cewa dakaru tare da haɗin gwiwar jami’an sa-kai na ci gaba da gudanar da sintiri da bincike a yankin domin farautar ‘yan ta’addan da suka tsere tare da hana su sake haɗuwa.