Hukumar leƙen asirin Turkiyya (MIT) ta kama mutane biyu da ake zargi da yin aiki ga hukumar leƙen asirin Isra’ila ta Mossad, bayan wani aiki mai sarkakiya na yaƙi da leƙen asiri da aka sanya wa suna “MONITUM.”
Majiyoyin tsaron Turkiyya a ranar Juma’a sun sanar da cewa an kama Mehmet Budak Derya da Veysel Kerimoglu a wasu ayyuka na haɗin gwiwa da MIT da kuma ofishin Babban Mai Shigar da Ƙara na Istanbul da kuma sashen yaƙi da ta’addanci na rundunar ‘yansandan Istanbul suka jagoranta.
A cewar masu bincike, Derya, wanda injiniyan hakar ma’adanai ne, ya kafa wani kamfani a shekarar 2005 sannan ya buɗe wurin haƙar dutse a yankin Silifke na birnin Mersin kafin ya faɗaɗa kasuwancinsa zuwa cinikayyar ƙasa da ƙasa. Ana zargin cewa faɗaɗar hulɗar kasuwancinsa da ƙasashe da dama ta ja hankalin leƙen asirin Isra’ila.
A watan Satumban 2012, wani mutum mai amfani da sunan ɓoye “Ali Ahmed Yassin,” wanda ke aiki a madadin wani kamfani na bogi da Isra’ila ta kafa, ya ziyarci ofishin Derya tare da ba shi tayin haɗin gwiwa, a cewar majiyoyin.
Zuwa watan Janairun 2013, an gabatar da Derya ga jami’an Mossad yayin wani taro a Turai.
Gudanar da tattaunawa a wasu ƙasashe
A lokacin waɗannan hulɗoɗi, wani jami’in Mossad mai amfani da sunan ɓoye “Luis” ya nemi a ɗauki Kerimoglu, ɗan ƙasar Turkiyya wanda ɗan asalin Falasɗin ne aiki. Ana zargin cewa an umarci mutanen biyu su riƙa bayar da rahoto a tare game da dukkan ayyuka da hulɗoɗinsu.
Majiyoyin tsaro sun ce Derya ya riƙa gudanar da tarurruka a ƙasashen Turai daban-daban da jami’an Mossad masu amfani da sunayen ɓoye kamar Luis, Jesus/Jose, Dr. Roberto/Ricardo, Dan/Dennis, Mark, Elly/Emmy da Michael.
Masu bincike na zargin cewa mutanen biyu sun riƙa tattara bayanai ta hanyar hulɗar zamantakewa da kasuwanci da Falasɗinawa masu sukar manufofin Isra’ila a yankin, sannan suna miƙa bayanai kan mutane, wurare da hanyoyin sadarwa ga leƙen asirin Isra’ila.
Ana kuma zargin Derya da ƙoƙarin samun izinin shiga Gaza, da yin binciken leƙen asiri kan wuraren ajiyar kaya a can, tare da aika hotuna ga Mossad.
