Borussia Dortmund ta sallami kocinta Nuri Sahin
Awanni bayan Borussia Dortmund ta sha kaye hannun Bologna a gasar Zakarun Turai, ƙungiyar ta sallami kocinta Nuri Sahin, ɗan asalin Jamus.
Borussia Dortmund ta kori kocinta Nuri Sahin, bayan da sabuwar shekarar nan ta ƙi yi wa ƙungiyar daɗi, inda ta yi rashin nasara a wasanni huɗu cikin 5 da ta buga a baya-bayan nan.
A ranar Laraba ne Dortmund ta sanar da korar kocin mai shekaru 36 ɗan asalin Jamus mai tsatso a Turkiyya, kwana guda bayan da suka sha kaye da ci 2-1 a hannun Bologna a gasar Zakarun Turai mako na 7.
Wannan rashin nasara ita ce ta huɗu a wannan shekara, kuma ta mayar da ƙungiyar zuwa mataki na 13 a gasar da ta ƙunshi ƙungiyoyi 36. Haka nan Dortmund tana mataki na 10 ne da maki 25 a gasar Bundesliga, bayan wasanni 18.
Daraktan wasanni na ƙungiyar, Lars Ricken, ya faɗa a wata sanarwa cewa, “Muna matuƙar girmama Nuri Sahin da aikinsa, kuma mun so mu yi aiki da shi tsawon lokaci kafin yanzu".
"Bayan shan kaye sau 4 a jere, da nasara a wasa ɗaya kacal cikin wasanni 9 na baya-baya nan, da kasancewa a mataki na 10 a Bundesliga, muna baƙin cikin cewa mun cire tsammani kan cimma manufarmu ta wasa a wannan yanayi.
"Wannan mataki ya min ciwo ni kaina, amma ba za mu iya kaucewa hakan ba bayan wasanmu da Bologna."
Kocin riƙo
A yanzu dai kocin 'yan ƙasa da shekaru 19 na ƙungiyar, Mike Tullberg shi zai karɓi ragama a wasan Dortmund na gaba da Werder Bremen, a gasar Bundesliga ranar Asabar. Amma ba a ambaci wa zai zama koci na dindindin ba.
A watan Yunin da ya gabata ne Nuri Sahin ya karɓi aiki bayan da a baya yake mataimakin tsohon koci Edin Terzic, wanda ya ajiye aiki bayan Dortmund ta sha kaye da ci 2-0 a hannun Real Madrid a wasan ƙarshe na Zakarun Turai na bara.
A wasansu da Bologna, an ga ɗan wasansu Serhou Guirassy ya yi murnar cin ƙwallo tare da Sahin, a wani abu da aka kalla a matsayin nuna goyon baya. Sai dai an ci Dortmund ƙwallo 2 a mintuna 2, sannan aka tashi da 2-1.
Nuri Sahin yana da masoya a Dortmund tun sanda yana buga wasa, bayan ya shiga ƙungiyar yana matashi a 2001, kafin ya koma Real Madrid bayan shekara 10. Sannan ya sake dawowa Dortmund a karo na biyu a 2013 zuwa 2018.
Sai dai kafin aiki a Dortmund, Sahin ba shi da tarihin horar da wata babbar ƙungiya idan ban da riƙe ƙungiyar Antalyaspor ta Turkiyya.