Kenya ta ƙara farashin man fetur da dizal daga ranar Laraba, sakamakon tsadar kuɗin shigo da man daga ƙasashen waje, wanda ake dangantawa da rikicin Gabas ta Tsakiya, a cewar hukumar kula da makamashi ta ƙasar.

Ƙasar da ke Gabashin Afirka ta ƙara farashin man fetur da kashi 6 cikin 100, yayin da farashin dizal ya ƙaru da kashi 4.5 cikin 100. Kenya na dogaro sosai da man fetur da take shigowa da shi daga ƙasashen waje, ciki har da waɗanda ke yankin Gabas ta Tsakiya.

A babban birnin ƙasar, Nairobi, farashin litar dizal ya tashi daga shilling 217.86 zuwa shilling 227.76 na Kenya, kwatankwacin dala 1.76. Haka kuma, farashin kananzir ya ƙaru daga shilling 191.38 zuwa shilling 219.87 kan kowace lita.

Sabbin farashin za su ci gaba da aiki daga ranar 15 ga Oktoba zuwa 14 ga Nuwamba, lokacin da ake sa ran sanar da sabon farashin.

Hukumar kula da makamashin ta ce gwamnati ta tsawaita rage harajin VAT da ake karɓa kan man fetur daga kashi 16 zuwa kashi 8 cikin 100 har zuwa ranar 14 ga Janairu.

Masana sun yi gargaɗin cewa ƙarin farashin man fetur na iya ƙara kuɗin sufuri da na gudanar da harkokin noma da gine-gine. Hakan na iya haifar da tashin farashin kayayyaki da ayyuka, tare da ƙara nauyin kashe kuɗi ga jama’a da ’yan kasuwa.

A shekarar 2025, jimillar kayayyakin da Kenya ta shigo da su daga ƙasashen waje ta kai kusan dala biliyan 24.93.

Yankin Gabas ta Tsakiya na ci gaba da kasancewa muhimmiyar hanyar da Kenya ke samun man fetur da sauran kayayyakin makamashi da ake amfani da su a masana’antu.