Galatasaray ta samu gagarumar nasara da ci 5-2 a kan ƙungiyar ƙwallon ƙafa ta Juventus mai ‘yan wasa 10 a zagaye na farko na karawarsu a gasar Zakarun Turai, inda Noa Lang da Gabriel Sara suka taka rawar gani a wasan.
Sara ne ya fara zura ƙwallo a ragar masu masaukin baƙi a ranar Talata minti 15 da fara wasa, amma Juventus ta rama nan-take ta hanyar Teun Koopmeiners.
Koopmeiners ya zura ƙwallo na biyu minti 32 da fara wasa da wani ƙwallon da ya buga daga wajen gidan Galatasaray, lamarin da ya sa ƙungiyar ta Italiya ta shige gaban ƙungiyar ta Turkiyya.
Galatasaray ta rama bayan an dawo daga hutun rabin lokaci yayin da Lang ya zura ƙwallo a raga bayan ƙoƙarin zura ƙwallon Baris Alper Yilmaz ya ci tura.
Kana ƙungiyar ta Turkiyya ta ƙara ƙwallo a lokacin Davinson Sanchez ya zura wata ƙwallon da Sara ya turo cikin raga.
‘Yanwasan Juventus sun ragu zuwa 10 minti 67 da fara wasa a lokacin da aka bai wa Juan Cabal jan kati domin ya samu katin gargaɗi biyu.
Lang ya ƙara zura ƙwallo a ragar Juve minti 75 da fara wasa, kafin Sacha Boey ya ƙara ƙwallo na biyar minti huɗu kafin a kammala wasan.
Za a buga zagaye na biyu na wasan a birnin Turin ranar 25 ga watan Fabrariru.
