Turkiyya ta gudanar da bukukuwan cika shekaru 103 da kafa Jamhuriyarta a ranar Alhamis, 29 ga Oktoba, tare da gudanar da bukukuwa daban-daban a babban birnin ƙasar, Ankara, da sauran sassan ƙasar.

An fara bukukuwan ne a Ankara, inda Shugaba Recep Tayyip Erdoğan, tare da manyan jami’an gwamnati, suka ziyarci Anıtkabir, wurin tunawa da kuma kabarin wanda ya kafa Jamhuriyar Turkiyya, Mustafa Kemal Atatürk.

A wurin, Erdoğan ya ajiye furanni na girmamawa, ya yi shiru na ɗan lokaci domin tunawa da Atatürk, sannan ya sanya hannu a littafin tunawa da shi. Daga bisani, shugaban ya karɓi saƙonnin taya murna a fadar shugaban ƙasa.

A wani saƙon bidiyo, Erdoğan ya bayyana cewa Turkiyya ta fi ƙarfin da take da shi a jiya, kuma za ta ci gaba da samun ƙarfi, ɗaukaka da ƙwarewa a fannoni daban-daban a nan gaba.

Ya kuma yi tsokaci kan ci gaban da ƙasar ta samu a cikin shekaru 24 da suka gabata, musamman a fannonin tsaro, makamashi, sufuri da diflomasiyya.

An ayyana Jamhuriyar Turkiyya ne a ranar 29 ga Oktoba, 1923, bayan amincewar dukkan mambobi 158 da suka halarci zaman Majalisar Dokokin ƙasar a lokacin. Daga bisani, an zaɓi Atatürk a matsayin shugaban ƙasar na farko, inda ya samu ƙuri’u 158.

A ranar Alhamis, manyan jami’an gwamnatin Turkiyya sun gudanar da bukukuwa da saƙonnin taya murna domin tunawa da ranar kafa Jamhuriyar.

Ministan Shari’a, Akın Gürlek, ya bayyana cewa gwamnati na aiki domin cimma muradun shekarun 2053 da 2071 a ƙarƙashin jagorancin Erdoğan, da nufin ci gaba da raya ƙasar.

Shi kuwa shugaban Jam’iyyar Masu Kishin Ƙasa ta MHP, Devlet Bahçeli, ya ce jam’iyyarsa ta jajirce wajen ganin an cimma nasarorin da ake fata a ƙarƙashin shirin da ake kira “Ƙarnin Turkiyya”.

Shugaban Hukumar Leƙen Asiri ta Ƙasa (MIT), İbrahim Kalın, ya bayyana cewa Jamhuriyar Turkiyya tana wakiltar ’yancin kai, haɗin kai da makoma ta bai ɗaya. Ya ƙara da cewa hukumar za ta ci gaba da gudanar da ayyukanta domin kare tsaron ƙasa da ’yancin cin gashin kanta.

Shugabannin ƙasashen Turkawa sun taru a Ankara

Bukukuwan bana sun zo daidai da taron koli na 13 na Ƙungiyar Ƙasashen Turkawa (OTS), wanda aka shirya gudanarwa a Ankara daga ranar 29 zuwa 30 ga Oktoba, tare da halartar shugabannin ƙasashe biyar mambobin ƙungiyar.

Erdoğan zai ƙaddamar da lambun shakatawa na ƙasa na Beştepe, tare da wani shirin hawan dawakai, sannan ya karɓi baƙuncin shugabannin ƙasashen da suka halarci taron a wani liyafar cin abinci ta musamman.

An shirya tarbar baƙin ne da tawagar makaɗan gargajiya ta Mehter, da sojoji, da kuma tutocin da ke wakiltar ƙasashe 16 masu al’adun Turkawa.

Shugaban Kyrgyzstan, Sadyr Japarov, zai karɓi wata lambar yabo ta ƙasa, yayin da za a kuma bayar da kyautar Ali Şir Nevai ta ƙasa da ƙasa ta wannan shekarar.

Shirin bukukuwan zai kuma ƙunshi kaɗe-kaɗe daga makaɗan fadar shugaban ƙasar Turkiyya, raye-rayen gargajiya da ƙungiyar TURKSOY, wadda ke aikin bunƙasa al’adu da fasahohin ƙasashen Turkawa, za ta gabatar.

Haka kuma, mawaƙin Turkiyya Kıraç da mawaƙin Kazakhstan, Dimash Qudaibergen, za su gabatar da waƙoƙi kai tsaye.

Bukukuwa a sassan ƙasar

An gudanar da bukukuwan Ranar Jamhuriyar a sassa daban-daban na Turkiyya, inda jama’a suka shiga ayyukan tunawa da ranar ta hanyoyi daban-daban.

Ɗaya daga cikin shirye-shiryen shi ne wani rangadin masu tuka kekuna a dukkan larduna 81 na ƙasar, daga ranar 29 ga Oktoba zuwa 1 ga Nuwamba, gabanin taron sauyin yanayi na COP31 da aka tsara gudanarwa a Antalya daga ranar 9 zuwa 20 ga Nuwamba.

Shirin, wanda ya ƙunshi ’yan wasan motsa jiki masu lasisi, ƙungiyoyin masu tuka kekuna, ɗalibai, iyalai da sauran masu sha’awar wasan, na da manufar ƙara amfani da keke a matsayin hanyar sufuri mai ɗorewa, tare da wayar da kan jama’a game da sauyin yanayi.

A wani shirin kuma, mahaya dawakai sun bi hanyar Istiklal mai cike da tarihi domin tunawa da cika shekaru 103 da kafa Jamhuriyar.

Wannan shi ne karo na uku da Ƙungiyar Dawakai da Al’adu ta shirya irin wannan rangadi, wanda ya bi hanya mai tsawon kilomita 95. Hanyar tana da muhimmanci a tarihi saboda an yi amfani da ita wajen jigilar makamai da harsasai daga tashar jiragen ruwa ta İnebolu zuwa yankin Anatolia a lokacin Yaƙin ’Yancin Kai na Turkiyya.

Mahaya dawakai 45 daga sassa daban-daban na ƙasar ne suka halarci wannan tafiya ta kwanaki biyu.

Haka kuma, an shirya gudanar da tseren gudu na Osmangazi-Turkiyya a kan gadar Osmangazi, inda ake sa ran kusan masu tsere 6,000 za su halarta. An karɓi kusan buƙatun shiga 8,000, yayin da ’yan wasa daga ƙasashe 19 suka yi rajista.

Tseren ya ƙunshi gudun kilomita 10 na ƙwararrun ’yan tsere da kuma gudun kilomita biyar na sauran jama’a.

Magajin garin Kocaeli, Tahir Büyükakın, ya ce masu shirya tseren na da burin mayar da shi gasa ta shekara-shekara, wadda za ta haɗa mutane daga shekaru daban-daban domin tunawa da Ranar Jamhuriyar.

A birnin Çorum kuwa, mazauna sun gudanar da wani maci, inda suka riƙe tutar Turkiyya mai tsawon mita 103.

A Diyarbakır, ɗalibai sun buɗe wata babbar tutar Turkiyya mai faɗin murabba’in mita 54 a yankin tarihi na İçkale, da ke gundumar Sur. An gudanar da bikin ne a ƙarƙashin inuwar katanga da tsoffin gine-ginen birnin masu tarihin dubban shekaru.

An shirya taron ne tare da haɗin gwiwar ofishin ma’aikatar ilimi na yankin, kuma an ɗauki hotunan bidiyon bikin daga sama ta amfani da jirgi mara matuƙi.