Rasha da China sun sanyawa takardu sama da 40 hannu da suka shafi tattalin arziki, makamashi, sufuri, da haɗin gwiwar ƙasa da ƙasa biyo bayan tattaunawa tsakanin Shugaban Rasha Vladimir Putin da takwaransa na China Xi Jinping a Beijing.

Fadar Kremlin ta bayyana a cikin wata sanarwa a ranar Laraba cewa, an sanya wa takardu 22 hannu a wani taro na musamman bayan kammala tattaunawar Putin da Xi, yayin da aka sake kulla wasu yarjejeniyoyi da takardun amincewa guda 20 a gefen taron kolin na shugabannin kasar.

Putin da Xi sun amince da wata sanarwa ta haɗin gwiwa kan ƙara ƙarfafa kawance da zurfafa alaƙa tsakanin Rasha da China, haka kuma da wata sanarwa ta haɗin gwiwa kan kafa tsarin duniya mai rassa da yawa da sabon nau’in alaƙar ƙasa da ƙasa.

Rasha da China sun gina ingantaccen tsarin cinikayya na tsakanin kasashen biyu wanda aka kiyaye shi daga matsin lamba na waje da kuma sauyin da ake samu a kasuwannin duniya, kamar yadda Putin ya shaida wa taron manema labarai bayan ganawarsa da Xi.

Alaƙar Kasuwanci

Ya yi bayanin cewa gudanar da cinikayya ta amfani da kuɗaɗen Ruble da Yuan yana taimakawa wajen kare haɗin gwiwar tattalin arziki daga “tasirin waje” kuma yana tabbatar da dorewar alaƙar kasuwanci tsakanin ƙasashen biyu.

“Matakan haɗin gwiwa da Rasha da China suka ɗauka don sauya hanyoyin biyan kuɗi tsakaninsu, tsakanin ƙasashenmu gaba ɗaya, zuwa kuɗaɗen ƙasa, sun kasance masu muhimmanci ƙwarai. A sakamakon haka, kusan dukkanin ayyukan shigo da kaya da fitar da su na Rasha da China ana yin su ne da Ruble da Yuan,” in ji shi.

Putin ya ce Rasha a shirye take ta ci gaba da samar da mai da iskar gas ga China ba tare da katsewa ba, kuma kamfanin nukiliya na Rasha, Rosatom, yana kammala aikin gina sabbin sassan samar da wutar lantarki a tashoshin makamashin nukiliya da ke China, a matsayin wani ɓangare na fadadan haɗin gwiwar makamashi tsakanin ƙasashen biyu.

Shugaban na Rasha ya kuma bayyana kawancen Rasha da China a matsayin wani katsalandan mai daidaita al’amura a harkokin ƙasa da ƙasa.

Putin ya nuna abin da ya kira kyakkyawan sakamako daga tsarin tafiye-tafiye ba tare da biza ba tsakanin ƙasashen biyu, wanda ya haɓaka yawon buɗe ido da musayar al’adu tsakanin mutanen ƙasashen biyu.

“A cikin shekarar 2025, fiye da ’yanRasha miliyan 2 ne suka China. Kuma sama da ’yan ƙasar China miliyan 1 ne suka ziyarci Rasha,” in ji shi.