Wani tsohon babban jami’in Sojojin Nijeriya mai ritaya, Manjo Janar Rabe Abubakar, ya rasu yayin da yake tsare a hannun ’yanbindiga a arewa maso yammacin Nijeriya, kamar yadda Gwamnatin Jihar Katsina State ta sanar a ranar Asabar.

A cikin wata sanarwa, gwamnatin ta ce ta samu labarin rasuwar tsohon janar ɗin “cikin matsanancin alhini da jimami,” tana mai bayyana lamarin a matsayin babban rashi ga iyalansa, jihar Katsina da kuma Nijeriya baki ɗaya.

Bisa ga sanarwar, Abubakar ya rasu ne sakamakon matsalolin rashin lafiya da suka shafi ciwon sukari da hawan jini yayin da yake tsare a hannun masu garkuwa da shi.

Gwamnatin ta ce jami’an tsaro da hukumomin jihar sun yi ƙoƙari sosai wajen ganin an kuɓutar da shi bayan sace shi, amma duk da haka ba a samu nasarar hana afkuwar wannan mummunan lamari ba.

Gwamnan Jihar Katsina, Dikko Umaru Radda, ya miƙa ta’aziyyarsa ga iyalan marigayin tare da bayyana lamarin a matsayin “wani lokaci mai duhu,” wanda ya nuna muhimmancin ƙara haɗa kai wajen yaƙi da masu aikata laifukan da ke barazana ga zaman lafiyar al’umma.

An yi garkuwa da tsohon Manjo Janar ɗin ne tare da matarsa, Hajiya Amina Abubakar, da direbansu yayin da suke tafiya a jihar Katsina a farkon wannan watan.

Rahotanni sun ce an tare motarsu ne a kan hanyar Marabar Musawa–Kafinsoli da ke ƙaramar hukumar Matazu.

Bayan kwanaki da sace su, masu garkuwar sun fitar da wani bidiyo da ke nuna ma’auratan a tsare. A cikin bidiyon, matar janar ɗin ta roƙi gwamnati da ta shiga tsakani tare da isar da buƙatun masu garkuwar, waɗanda suka haɗa da sakin wasu mutane uku da ake tsare da su da kuma mayar musu da dabbobin da suke zargin an ƙwace musu.

Ba a ambaci neman kuɗin fansa a cikin bidiyon ba.

Shi ma tsohon janar ɗin ya yi gajeriyar magana a cikin bidiyon, inda ya yi kira da a samar da zaman lafiya da tattaunawa.

Jihar Katsina na daga cikin jihohin arewa maso yammacin Nijeriya da suka daɗe suna fama da matsalar ’yanbindiga. Ƙungiyoyin masu aikata laifuka a yankin sun yi ƙaurin suna wajen sace mutane, kai hare-hare kan ƙauyuka da satar shanu, inda suke kai hari ga matafiya, al’ummomi da kuma fitattun mutane domin neman kuɗin fansa ko wasu buƙatu.

Rasuwar wani tsohon babban jami’in soja a hannun masu garkuwa da shi na iya ƙara tayar da hankali kan matsalar tsaro a yankin da kuma ƙalubalen da hukumomi ke fuskanta wajen magance ayyukan ƙungiyoyin masu ɗauke da makamai a arewa maso yammacin Nijeriya.