Yayin da za a buɗe gasar Kofin Duniya ta FIFA 2026 a wannan makon, gwarzon ɗanwasan Argentina, Lionel Messi, ya bayyana kyakkyawan fatansa na sake kai ƙasarsa ga nasarar lashe Kofin Duniya.
A gasar ta ƙarshe da ta gudana a Qatar, Argentina ce ta lashe kofin, kuma a gasar bana da za a buɗe ranar Alhamis 11 ga Yuni a ƙasashen Amurka, Canada, da Mexico, ƙasar na burin maimaita hakan.
Yau Laraba ne Argentina ta buga wasan sada-zumunta da Iceland, inda ta lashe wasan da ci 3-0, inda Messi ya ce ƙwallo ɗaya a minti na 70 kuma ya kafa sabon tarihin cin ƙwallaye mafi yawa, har 117 ga ƙasarsa.
Messi yana da shekaru 38, da wata 11, da kwana 14, wanda ke nufin ya zama ɗanƙwallo mafi tsufa da ciyo wa Argentina ƙwallo, inda ya wuce tsohon ɗanwasan ƙasar, Angel Labruna da ya kafa tarihin tun a 1957.
Maimaita nasara
A wannan wasan da Messi ya buga wa ƙasarsa a karo na 199, Messi ya zama ɗanwasan da ya fi yawan taka wa Argentina leda a tarihi.
Sai dai har yanzu Labruna ne mafi tsufan ɗanwasan da ya buga wa Argentina Kofin Duniya, lokacin yana da shekara 39 da kwana 260 a 1958, kuma Messi ba zai iya rushe wannan tarihin ba a bana.
Da aka tambaye shi game da yadda yake ji bayan buga wasan sada-zumunta gabanin fara Kofin Duniya, Messi ya nuna farin cikinsa da yadda ya samu sauƙi bayan jinyar da ya yi.
Game da Kofin Duniya, Messi ya bayyana cewa, “Kamar yadda aka saba, duk sanda gasa ta fara, musamman ta Kofin Duniya, ina shiga ɗoki sosai. Na faɗa a wancan lokacin wannan tawagar ba za ta ba da kunya ba, kuma hakan aka yi…”
“[Argentina] ce tawagar da ta yi nasara kuma a koyaushe tana son ƙara yin hakan. Za mu yi hakan mataki-mataki kamar kullum, amma cike da karsashi, ɗoki, da imani kan abin da muke iyawa."
