‘Yan majalisar dokokin Amurka za su gana ranar Talata a kan 'ta’azzarar rashin tsaro' a Nijeriya

Kwamitin Kasafin Kuɗi na Majalisar Dokokin Amurka zai shirya taron hadin gwiwa na Mjalisar Dokoki a ranar Talata domin yin nazari kan zargin ƙuntata wa Kiristoci a Nijeriya.

Dan majalisar dokokin Amurka Riley Moore ya wallafa wata sanarwa a shafin X, inda ya tabbatar da cewa mataimakin shugaban kwamitin kasafin kudi na majalisar kuma shugaban kwamitin tsaro na kasa Mario Díaz-Balart ne zai jagoranci zaman.

Zaman zai kuma hada da jin ta bakin abokan aikin daga kwamitin kasafin kudi, da kuma membobin kwamitin harkokin waje da ayyukan kudi.

Taron zai kuma kunshi bayanai daga wakilan kwamitin Amurka kan 'yancin addini na duniya da sauran kwararru kan batutuwan da suka shafi hakan.

A cewar sanarwar, za a yi zaman ne da nufin jawo hankali "don fayyace tashin hankali da kuma tsananta wa Kiristoci a Nijeriya."

Taron ya ƙara da cewa "Za a tattara muhimman shaidu domin bayar da cikakken rahoto - wanda Shugaba Trump ya jagoranta - kan zargin kisan kiyashin da ake yi wa Kiristocin Nijeriya da kuma matakan da Majalisar Dokoki za ta iya dauka don tallafa wa kokarin Fadar White House na kare al'ummomin addinai masu rauni a duk duniya."

Taron zai gudana ne a daidai lokacin da ake ci gaba da tattaunawa tsakanin Amurka da Nijeriya bayan ƙaruwar hare-haren ta'addanci kwanan nan, yana mai nuna kokarin karfafa hadin gwiwar tsaro tsakanin kasashen biyu.

A makon da ya gabata, Shugaba Bola Tinubu ya amince da kundin tsarin mulkin bangaren Nijeriya na tawagar hadin gwiwa tsakanin Amurka da Nijeriya a matsayin wani bangare na matakan zurfafa hadin gwiwa wajen magance kalubalen tsaro a kasar.

Shirin tawagar wani bangare ne na yarjejeniyar da aka cim ma a lokacin ziyarar da babban jami'in Nijeriya karkashin jagorancin mai ba da shawara kan harkokin tsaro na kasa, Nuhu Ribadu a kwanan nan zuwa Washington, DC.

Kalubalen tsaron Nijeriya ya jawo hankalin duniya lokacin da Shugaba Donald Trump ya yi kira ga kasashen duniya da su yi Allah wadai da kisan kiyashin Kiristoci a Nijeriya, yana mai barazanar tura sojojin Amurka zuwa Nijeriya.

Amma Gwamnatin Tarayyar Nijeriya ta musanta ikirarin, tana mai cewa tana daukar matakai don magance kalubalen tsaro a kasar.

Haka kuma, Shugaba Tinubu ya ce tsaron 'yan Nijeriya shi ne babban abin da gwamnatinsa ta sa a gaba, kuma ya dage cewa kasar za ta ci gaba da jajircewa wajen kare 'yancin addini da hakuri.

A ranar 21 ga Nuwamba, Kwamitin Majalisar Wakilai ta Amurka kan Afirka ya sake duba sake fasalin Najeriya a matsayin Kasa Mai Damuwa ta Musamman (CPC).

A lokacin zaman, masu jawabi daban-daban, yayin da suke bayar da shaida a gaban karamin kwamitin sun bayyana ra'ayoyi daban-daban kan kashe-kashen da ake yi a Najeriya.