Attajirin da ya fi kowa kuɗi a Afirka, Aliko Dangote ya naɗa ’ya’yansa mata uku a manyan muƙamai a kamfanoninsa, matakin da masana ke gani a matsayin wani muhimmin shiri na tabbatar da dorewar daular kasuwancinsa.

Dangote, wanda a yanzu ya mallaki fiye da dala biliyan 30 kamar yadda Bloomberg ta bayyana, ya rarraba muƙamai ga ’ya’yansa a muhimman fannoni na kasuwancinsa da suka haɗa da siminti, abinci, da kuma man fetur da iskar gas.

Wannan mataki na zuwa ne a daidai lokacin da manyan kamfanonin iyali a duniya ke ƙara maida hankali kan tsarin mika shugabanci ga sabon zuri’a.

Mariya Dangote: Babbar ’ya a Kamfanin Siminti da Abinci

Babbar ’yar Dangote, Mariya Aliko Dangote, ita ce aka naɗa shugabar kasuwanci a Kamfanin Siminti na Dangote da kuma bangaren abinci na kamfanin.

Kafin wannan muƙami, Mariya ta riƙe manyan mukamai a cikin kamfanin, ciki har da zama ɗaya daga cikin manyan jami’an gudanarwa na Kamfanin Siminti na Dangote. Haka kuma ta taɓa zama Babbar Darakta a Kamfanin Suga na Dangote.

A sabon aikinta, za ta jagoranci tsare-tsare da bunƙasa ayyukan kasuwanci a manyan fannoni biyu na Daular Dangote — matakin da ke nuna amincewar kamfani da ƙwarewarta a harkokin kasuwanci da gudanarwa.

Halima Dangote: ‘Ya ta biyu za ta jagorancin Ofishin Iyali da Ofisoshin Ƙasashen Waje

Halima Aliko Dangote, wacce ita ce ta biyu a cikin ’ya’yan Dangote, an ba ta ragamar jagorancin Dangote Family Office & International Offices, mai hedikwata a birnin Dubai.

Halima na da ƙwarewar fiye da shekaru 10 a harkokin kasuwanci. Ita ce ta jagoranci sayar da kamfanin fulawa na Dangote, sannan ta taɓa aiki a kamfanin abinci na NASCON, wani reshe na kamfanonin Dangoten.

A sabon muƙaminta, za ta mayar da hankali kan bunƙasa shugabanci da tafiyar da ayyukan kamfanonin Dangote da ke ƙasashen waje, lamarin da ke nuna ƙara faɗaɗa tasirin kamfanin a kasuwannin duniya.

Fatima Dangote: ‘Yar auta za ta riƙe ɓangaren Mai da Iskar Gas

’Yar auta Fatima Aliko Dangote kuwa za ta kula da harkokin kasuwanci a fannin man fetur da iskar gas a Matatar Mai ta Dangote da ke Jihar Legas.

Fatima lauya ce mai ƙwarewa a fannin shugabanci da harkokin doka. Masana na ganin rawar da za ta taka na da matuƙar muhimmanci, musamman a wannan lokaci da matatar mai ta Dangote ke ƙoƙarin ƙarfafa ayyukanta da kuma tabbatar da tsayuwar daka a kasuwar cikin gida da ta ƙasashen waje.

Tsarin Gado: Darasi Daga Duniya

Masana harkokin kasuwanci na kallon wannan mataki a matsayin wani tsari na tabbatar da dorewar kasuwancin iyali.

A duniya, manyan attajirai kan fara shigar da ’ya’yansu cikin shugabanci tun da wuri domin tabbatar da sauƙin mika mulki a nan gaba.

Misali, a Indiya, fitaccen attajiri Mukesh Ambani ya bai wa ’ya’yansa muƙamai a cikin kamfaninsa a matsayin wani ɓangare na tsarin gado.

Haka kuma a Nijeriya, attajiri Abdul Samad Rabiu ya naɗa ɗansa Isyaku Abdulsamad Rabiu (Khalifa Rabiu) a wani muƙami na gudanarwa a kamfanin BUA.

Me wannan ke nuna wa Nijeriya?

Naɗin ’ya’yan Dangote na nuna yadda kamfanonin iyali a Afirka ke fara ɗaukar tsarin gado da muhimmanci.

Rashin ingantaccen tsarin mika shugabanci kan zama barazana ga dorewar manyan kamfanoni bayan janyewar wanda ya assasa su.

Saboda haka, shigar da sabuwar tsararraki cikin shugabanci na iya zama wata hanya ta tabbatar da dorewa, ƙarfafa tsarin gudanarwa, da kuma tabbatar da cewa kamfani zai ci gaba da tafiya cikin ƙarfi a nan gaba.

A ƙarshe, wannan mataki ba kawai naɗin iyali ba ne — yana iya zama sabon babi a tarihin daular kasuwanci mafi girma a Afirka.