Hukumar Gasar Ƙwallon Ƙafa ta Amurka, Major League Soccer (MLS), ta yanke hukuncin haramata wa ‘yanwasan ƙungiyar Columbus Crew su biyu buga wasa har abada, saboda laifin yin caca 'caca mai yawa'.
A ranar Litinin ne ɗanwasa ɗan asalin Ghana, Yaw Yeboah, da tsohon abokin wasansa a Columbus Crew, Derrick Jones suka samu wannan hukunci, kamar yadda sanarwar MLS ta nuna.
A halin yanzu, Yeboah da Jones, waɗanda suka kasance abokan wasa a Columbus Crew a 2024, ba su da kwantiragi da kowace ƙungiya.
Tun a Oktoba ne aka ba su hutun darakatarwa, yayin da ake gudanar da bincike kan zargin suna yin caca kan wasanni.
"Bayan nazarin sakamakon binciken, MLS ta tabbatar da cewa 'yan wasan sun shiga cikin caca mai yawa a kan wasannin ƙwallon kafa, ciki har da kan ƙungiyoyinsu, a kakar 2024 da 2025," in ji MLS a cikin sanarwar.
"A wani misali, dukkansu sun yi caca cewa Jones zai samu yalon kati a wani wasan ran 19 ga Oktoban 2024, wanda kuma ya samu."
'Samun bayanan sirri'
"MLS ta kuma gano cewa akwai yiwuwar 'yanwasan sun yaɗa bayanan sirri ga wasu masu caca game da niyyarsu na samun yalon katin," in ji hukumar, wadda yanzu ta shiga sahun masu fama da matsalar caca a Amurka bayan hukumar NBA da Major League Baseball.
"Babu wata shaida da aka gano da ta nuna cewa waɗannan ayyukan caca sun shafi sakamakon wani wasa," in ji MLS, inda kwamishina Don Garber ya ce hukumar "ta tsaya tsayin daka wajen tabbatar da sahihancin wasa."
Yaw Yeboah, mai shekaru 28, wanda ya buga wa ƙasarsa Ghana sau huɗu a 2021, na koma ƙungiyar Qingdao Hainiu ta kasar Sin a watan Fabrairu bayan fara ƙwallo a matakin ƙwararru tare da Manchester City.
Yeboah bai taɓa buga wasa a babbar tawagar Man City ba, sannan daga bisani an tura shi aro zuwa kulob-kulob a Faransa, Sifaniya da Belgium kafin ya koma MLS a 2022.
Jones, mai shekaru 29, an haife shi a Ghana amma ya wakilci Amurka a matakin ƙasa a tawagar ‘yan ƙasa da shekaru 23. Kafin buga wa Columbus, Jones ya yi wasa a Philadelphia Union, Nashville SC, Houston Dynamo, da Charlotte FC duka a Amurka.
