Fiye da kashi 60 cikin 100 na mata sojojin Jamus sun bayyana cewa sun fuskanci cin zarafi ta fuskar lalata a lokacin da suke bakin aiki, kamar yadda jaridar Der Spiegel ta ruwaito a ranar Laraba, bisa wani bincike.

Sakamakon binciken ya samo asali ne daga amsoshin mata sama da 4,000 da suka cike tambayoyin da Cibiyar Tarihin Soja da Nazarin Zamantakewa da ke Potsdam ta gudanar.

Masu binciken sun kasa ayyukan cin zarafin da aka ruwaito zuwa matakai huɗu bisa tsanani. Kusan kashi 40 cikin 100 na matan sun ce sun taɓa fuskantar kalaman batsa ko maganganun lalata a lokacin da suke aiki a rundunar sojin Jamus, Bundeswehr.

Wasu kashi 15 cikin 100 sun ce an taɓa cin zarafinsu ta hanyar ɗaukar hotunansu ba tare da izininsu ba, ko kuma sauya hotunan ta amfani da fasahar basirar ƙirƙirarriya (AI).

Haka kuma, kashi 8 cikin 100 sun ce sun fuskanci yunƙurin taɓa su ta hanyar da ba ta dace ba, yayin da kashi 2 cikin 100 suka ce sun fuskanci mummunan cin zarafin lalata kai tsaye.

Fiye da kashi ɗaya bisa uku na waɗanda suka amsa tambayoyin sun ce ba su kai ƙara ba, ko kuma ba za su kai ƙara ba, saboda rashin amincewa da manyansu ko kuma shakkar cewa za a gudanar da bincike yadda ya kamata.

Ƙarin rahotannin cin zarafi na tayar da hankali yayin da sojin ke shirin faɗaɗa rundunarsa

Sakamakon binciken ya fito ne a daidai lokacin da rundunar sojin Jamus ke ƙoƙarin ƙara yawan jami’anta, yayin da buƙatar ɗaukar matasa aikin soja ke ƙara ƙaruwa.

A makon da ya gabata, an ruwaito cewa babban kwamandan sojin Jamus ya nuna damuwa kan ƙaruwar rahotannin cin zarafi ta fuskar lalata a cikin rundunar.

A cewar Der Spiegel, Babban Sufeto Janar na Sojin Jamus, Carsten Breuer, ya bayyana lamarin a matsayin “abin da ba za a amince da shi ba” a cikin wata doka da ya fitar ga rundunar a watan Satumba.

Rahotannin cin zarafi, tun daga kalaman da ba su dace ba zuwa fyaɗe a barikin sojoji, sun ƙaru a cikin 'yan watannin nan.