Sabon Firaministan Birtaniya Andy Burnham ya yi alƙawarin gabatar da sabbin matakai a wannan makon domin rage tsadar rayuwa, kafin daga bisani ya bayyana wani sabon shirin gyaran ƙasar na tsawon shekaru 10 daga baya a wannan shekara.

Da yake jawabi a wajen ofishin Firaminista da ke 10 Downing Street a ranar Litinin, Burnham ya ce: "Birtaniya na bukatar ta nuna wa duniya cewa za ta iya dawo da kwanciyar hankalinta da zaman lafiyarta."

Ya ƙara da cewa: "Ba mu yi abin da ya kamata ba, kuma dole ne mu fi haka." Yana mai yi wa 'yan Birtaniya alƙawarin samun "ɗan sassauci a yanzu," Burnham ya ce gwamnatinsa za ta bayyana matakan da za ta ɗauka domin rage tsadar rayuwa, tare da yadda za ta samar da kuɗin aiwatar da su.

Game da shirye-shiryen dogon lokaci kuwa, ya ce: "Za mu taimaka wa matasa da dama su samu aikin yi ta hanyar sauya tsarin ilimi da ƙara musu tallafi, ciki har da tallafin kula da lafiyar ƙwaƙwalwa. Haka kuma za mu gina ƙarin gidajen gwamnati masu araha."

Tun da farko, Fadar Buckingham ta tabbatar da cewa Andy Burnham ya zama sabon Firaministan Birtaniya.

Burnham ya isa Fadar Buckingham jim kaɗan bayan Keir Starmer ya miƙa takardar murabus dinsa a hukumance daga mukamin firaminista.

A yayin ganawarsa da Sarki Charles na Uku, an bukaci Burnham ya kafa sabuwar gwamnati, wanda hakan ya tabbatar da shi a matsayin sabon firaministan ƙasar.

Kafin hakan, Starmer ya gabatar da jawabinsa na ƙarshe a matsayin firaminista a gaban ofishin 10 Downing Street, inda ya ce:

Ya kuma yi wa magajinsa, Andy Burnham, fatan samun nasara, tare da gode wa ma'aikatan 10 Downing Street da matarsa, Victoria, bisa goyon bayan da suka ba shi.

A cikin wata sanarwa, Fadar Buckingham ta ce:

Ana sa ran Burnham zai isa 10 Downing Street daga baya a ranar Litinin domin gabatar da jawabinsa na farko a matsayin Firaministan Birtaniya.