Shugaba William Ruto ya bayyana a ranar Juma’a cewa gwamnati za ta rage farashin man dizel a ƙasar da ke Gabashin Afirka domin tallafa wa masu amfani da shi, biyo bayan zanga-zangar da aka yi kan tsadar makamashi sakamakon rikicin Gabas Ta Tsakiya.

A cikin makon nan, masu motocin sufurin na haya a Kenya sun gudanar da yajin aikin kwanaki biyu, wanda ya yi sanadiyyar mutuwar mutane hudu tare da jikkata wasu kusan 30. Wannan mataki ya faru ne saboda fushin jama’a kan tsadar man fetur da ta janyo tsadar rayuwa.

A cikin jawabin nasa na talabijin, Ruto ya ce ya bayar da umarnin rage farashin dizel da shilling 10 na ƙasar Kenya kwatankwacin dalar Amurka 0.0772, a tsarin farashi na Yuni zuwa Yuli domin taimakawa wajen daidaita farashin a gidajen mai da kuma kawo ƙarin sauƙi ga talakawa.

“Ta hanyar yarjejeniyar samar da mai tsakanin gwamnati da gwamnati, mun tabbatar da samun wadataccen mai duk da cikas din da ake samu a tsarin rarraba kaya na duniya, ta yadda aka tabbatar da samun mai ba tare da katsewa ba a faɗin ƙasar,” in ji Ruto.

Ya ƙara da cewa gwamnatinsa ta kashe aƙalla shilling biliyan 28.1 na Kenya kan matakan rage farashin mai, kamar rage haraji, tsakanin watannin Afrilu da Yuni.

A makon da ya gabata ne Kenya ta ƙara farashin sayar da mai da kusan kashi 23.5% na tsarin farashi na watannin Mayu da Yuni, a daidai lokacin da ake fuskantar ƙarancin ɗanyen mai a duniya da kuma tsadar makamashi sakamakon rikicin Gabas Ta Tsakiya.