Sudan ta yi Allah wadai da harin da dakarun RSF suka kai Asibitin Al-Jabalain da ke jihar White Nile, wanda ta bayyana shi a matsayin "mummunan laifi."

Mutane bakwai sun mutu, ciki har da ma'aikatan lafiya biyu, da kuma wasu 11 da suka jikkata a ranar Alhamis a harin da jirgin sama marasa matuƙi ya kai kan asibitin, cibiyar lafiya ɗaya tilo da ke yankin, a cewar ƙungiyar likitocin Sudan.

Ƙungiyar ta ce harin ya lalata sassan ginin tare da lalata kayan aikin lafiya.

Masu AlakaTRT Afrika - Sudan ta nemi 'yan ƙasar da suka yi ƙaura zuwa ƙasashen waje saboda yaƙi su koma gida

A cikin wata sanarwa da ta fitar, ma'aikatar harkokin wajen Sudan ta ce harin ya zo ne daidai lokacin da ake aikin ba da rigakafin yara a asibitin, inda ta bayyana shi a matsayin wata ƙarin shaida ta kai hari da gangan kan fararen-hula da kayayyakin kiwon lafiya.

Katse muhimman ayyuka

Ma'aikatar ta kuma ce RSF ta kai hari kan ma’ajiyar magunguna da wuraren ajiye mai a birnin Rabak a wani yunƙuri na hana gudanar da muhimman ayyuka.

Sudan ta yi kira ga Majalisar Ɗinkin Duniya da Majalisar Tsaron Majalisar Ɗinkin Duniya da su yi Allah wadai da harin tare da ɗaukar matakin gaggawa don dakatar da keta haddi tare da hukunta waɗanda suka kai harin.

Kawo yanzu dai babu wani jawabi ko tsokaci daga RSF.

Daga cikin jihohi 18 na Sudan, RSF tana riƙe da iko da dukka jihohi biyar a yankin yammacin Darfur ban da wasu sassan Arewacin Darfur, waɗanda har yanzu suke ƙarƙashin ikon sojoji.

Sojojin suna riƙe da mafi yawan yankunan sauran jihohi 13 a faɗin yankin kudu, arewa, da gabas ta tsakiyar ƙasar, ciki har da babban birnin ƙasar, Khartoum.

Yaƙin da ya ɓarke tsakanin sojojin Sudan da RSF a watan Afrilun 2023, ya kashe dubban mutane tare da raba miliyoyi da matsugunansu.