China ta yi gargadi ranar Laraba cewa za ta “murƙushe” duk wani ƙoƙari na ƙetare na tsoma hannu kan batun Taiwan, bayan Japan ta yi shelar ajiye makamai masu linzami a kan wani tsibirin da ke kusa da Taiwan mai cin gashin kanta.
"Muna da ƙarfin zuciya da kuma jajircewa mai ƙarfi domin kare ‘yancinmu da kan iyakokinmu," in ji Peng Qingen, wani mai Magana da yawun ofishin China da ke sa ido kan harkokin Taiwan a wani taron maneman labarai cikin martaninsa ga wata tambaya kan shirin ƙaddamar da makaman.
"Za mu murƙushe tsoma baki na ƙetare."
Beijing tana ganin Taiwan a a matsayin ƙasarta kuma ba ta kawar da yiwuwar amfani da ƙarfi wajen karɓe iko da ita ba.
Gwamnatin tsibirin ta yi watsi da iƙirarin Beijing kan ikon da yankin, kuma ta ce ‘yan Taiwan kaɗai ne za su iya yanke hukunci kan makomarsu.
"Yadda Japan ta ƙaddamar da makamai a wuraren da ke kusa da yankin Taiwan na China don tsokana yana da matuƙar haɗari, abinda yake janyo tashin hankali a yankin da gangan da kuma neman arangamar soji," in ji Peng.
