Uganda na shirin sallamar majinyacin Ebola na ƙarshe a ranar Alhamis, wanda hakan ke nuna rana ta farko ta soma ƙidayar kwanaki 42 kafin a ayyana ƙasar a matsayin wacce ba ta da cutar Ebola, kamar yadda mai magana da yawun gwamnatin ƙasar ya bayyana.

A ƙarƙashin tsarin Hukumar Lafiya ta Duniya (WHO), za a iya ayyana ƙasa a matsayin wadda ta fita daga cikin jerin masu ɗauke cutar Ebola idan ba a samu sabbin alƙaluma na mutanen da suka kamu da cutar ba a tsawon kwanaki 42 a jere, bayan sallamar mutum na ƙarshe wanda aka tabbatar ya warke daga cutar.

 Uganda ta kai matakin ƙarshe na ɓarkewar cutar

Ma'aikatar Lafiya ta Uganda ta ce marasa lafiya daga cutar Ebola 17 sun warke, inda mutum ɗaya da aka keɓe ya rage kana an samu rahoton mutuwar mutane biyu.

Sannan an samu mutane biyar da suka kamu da cuta a cikin gida, yayin da 15 kuma suka shiga ƙasar da cutar.

Mai magana da yawun gwamnatin ƙasar Alan Kasujja ya ce za a sallami majinyaci na ƙarshe daga Asibitin Kula da Lafiya na Mulago da ke babban birnin Kampala, ranar Alhamis.

"Idan hakan ta faru, Uganda za ta soma ƙirga kwanaki, " kamar yadda Kasujja ya wallafa a shafinsa na X.

Ya ƙara da cewa "Idan kwanaki 42 suka wuce ba tare da an samu wani sabon mutum da ya kamu da cutar ba, Hukumar WHO za ta ayyana mu a matsayin ƙasar da ba ta da cutar Ebola."

Ƙasar da aka fi samu barkewar cutar, wadda WHO ta ayyana ta kai matakin gaggawa ta lafiyar jama'a wato Jamhuriyar Dimokuraɗiyyar Kongo (DRC) a watan Mayu, ta samu mutane 2,011 da aka tabbatar sun kamu da cutar da mutuwar mutane 754 ya zuwa ranar Labaran nan, a cewar alƙaluman gwamnatin ƙasar ta Congo.

Duk waɗanda aka tabbatar sun kamu da cutar suna da alaƙa da nau'in ƙwayar cutar Bundibugyo da ba a saba gani ba, wanda WHO ta bayyana a matsayin annobar cuta ta uku mafi girma a tarihi.