Babu wanda ke son sake ɗaukar hoto da Netanyahu, in ji Ministan Harkokin Wajen Turkiyya
Ministan Harkokin Wajen Turkiyya ya ce manufofin Netanyahu, da suka janyo mutuwa da rushe gine-gine a yankin, sun mayar da Isra’ila saniyar ware.
Firaministan Isra'ila Benjamin Netanyahu ya ƙara mayar da ƙasarsa saniyar ware ta hanyar dabbaka manufofin soji masu tsauri waɗanda suka haifar da mutuwa da barna a yankin, in ji Ministan Harkokin Wajen Turkiyya Hakan Fidan.
Da yake magana da manema labarai a Istanbul ranar Alhamis, Fidan ya ce a cikin yanayin da ake ciki, daidaita dangantaka da Isra'ila ya zama abin da ba zai yiwu ba - ba kawai ga Turkiyya ba, har ma ga ƙasashe da yawa a duniya.
"Muddin hakan ya ci gaba da faruwa, ba zai yiwu ba mu gyara alaka da Isra’ila, ba mu ba ma har da wasu ƙasashe da yawa," in ji Fidan, yana mai nuni da ayyukan soji da Isra'ila ke ci gaba da yi.
Jawabinsa ya nuna wata babbar gaskiyar diflomasiyya inda shugabancin Isra'ila ke fuskantar ƙaruwar adawa, ba kawai daga gwamnatoci ba, har ma daga ƙungiyoyin kare haƙƙin ɗan adam da aka zaɓa a Turai.
Fidan ya nuna rashin amincewar shugabannin Turai na yin mu'amala da Netanyahu a bainar jama'a, yana mai lura da cewa kaɗan ne kawai, idan ma akwai, ke son tafiya zuwa Isra'ila ko a ɗauki hotonsu tare da shi.
"Babu wanda zai je (Isra'ila)," in ji shi. "Me ya sa ba za su je ba? An zaɓi shugabannin Turai. Sun san cewa ɗaukar hoto tare da shi ba abu ne mai kyau ba a kwanakin nan."
Ministan na Harkokin Wajen Turkiyya ya bayyana wannan nesanta a matsayin shaida na karuwar killacewar diflomasiyya ta Isra'ila.
Ya yi tambaya ko da gaske Netanyahu zai iya ziyartar kowace ƙasa da ba Amurka ba, yana mai nuna cewa ko da ƙawayensa na ƙud-da-ƙud na ƙara taka tsantsan.
"Zai iya zuwa ko ina bayan Amurka? Ba zai iya ba. Wataƙila zai zo Girka" in ji Fidan.
Fidan ya ce bai kamata a ɗauki matsayin Turkiyya game da Isra'ila a matsayin wani abu da ya wuce gona da iri ko kuma ra'ayi da ke haifar da akida ba.
Madadin haka, ya bayyana shi a matsayin wani ɓangare na martani mai faɗi da aka yada a tsakanin al'ummomin duniya.
"Wannan ba shi ne matsayinmu kawai ba," in ji shi. "Manufa ce da al'ummomin duniya suka bayyana, waɗanda ke da tunani da ɗabi'u iri ɗaya, a cikin tsari da salo daban-daban."
Fidan ya ce wasu ƙasashe sun zaɓi bayyana adawarsu ga Isra'ila a fili, yayin da wasu suka zaɓi yin amfani da hanyoyi na nutsuwa na rabuwa da Isra'ila, suna guje wa ziyarar shugabanninsu zuwa kasar.
Ya kuma bayyana cewa wannan bambancin salo, ba ya canza ainihin saƙon da ake aika wa shugabannin Isra'ila.