Wani Sanatan Amurka Mark Warner a ranar Litinin ya ce Amurka na fuskantar ƙaruwar wariya ta addini da kuma tashin hankali mai cike da ƙiyayya, yana zargin gwamnatin Trump da taka rawa wajen ƙara yaduwar ƙiyayyar Musulmai da kuma ra'ayin ƙin Larabawa.

Warner ya ce ya yi magana a gaban Majalisar Dattawa domin yin Allah wadai da ƙaruwar ƙyamar addini da ƙiyayya mai tsanani da Amurkawa ke nunawa, tare da jan hankali kan yadda mulkin Trump ya rura wutar ƙyamar Musulunci da ƙin jinin Larabawa.”

"A yau na tsaya nan musamman don yin Allah wadai da wariyar da al'ummominmu na Musulmai da Larabawa 'yan Amurka ke fuskanta, kuma abin takaici ganin yadda Shugaban Ƙasar nan ɓaro-ɓaro yake nuna goyon bayan nuna wariya da ƙin jinin Musulunci,” in ji Sanatan.

A matsayin misali, Warner ya nuna maganganun da Shugaba Donald Trump ya yi a wani zaman Majalisar Bakanoni a watan da ya gabata game da mutane ‘yan asalin Somali, inda ya kira al'ummar da 'shara' kuma ya ce, 'Ba ma son su a ƙasarmu.'

Warner ya ce ya kira maganganun Trump 'masifa, da rage darajar ɗan’adam, kuma suna saɓa wa ƙa'idodin Amurka', yana jaddada cewa ya kamata a yi Allah wadai da su da kakkausar murya, kana ya kamata dukkan jami'an gwamnati su yi tur da hakan.

Maganganu masu ƙona rai a Majalisar Dokoki

Sanatan ya kuma soki maganganun ƙona rai da ake yi a cikin Majalisar, yana mai cewa wani sanatan da bai bayyana sunansa ba kwanan nan ya bayyana Musulunci a matsayin 'addini mai guba' wanda 'hakan bai dace da ƙimominmu na Ƙasashen Yamma ba'.

"Dukkanmu musamman ma mu da muke yi aiki a matsayin wakilan al’umma, dole ne mu kawo ƙarshen wannan shiru kuma cikin ƙarfi da ƙuduri mu yi Allah wadai da ƙiyayyar da ake nuna wa Musulmai da kuma ƙyamar Larabawa," in ji Warner.

Da yake magana kan gabatowar wata mai tsarki na Ramadan, Warner ya yi kira ga sabunta ƙudurin tunkarar nuna bambanci da wariya.

"A wata mai zuwa ga 'yan’uwanmu Musulmai za su fara azumin Ramadan, musamman a wannan lokacin na tunani ... amma gaskiya, a duk tsawon shekara, ya kamata ya zama wajibi a gare mu mu kira dukkan nau'ikan son-kai da wariya ga kowace al'umma ta addini kuma mu tsaya tsayin daka don kare duk al'ummominmu daga rashin adalci," in ji shi.