Fadar White House ta bayyana cewa Mataimakin Shugaban Ƙasar Amurka, JD Vance, ya dage tafiyarsa zuwa ƙasar Switzerland sakamakon rashin warware wasu batutuwa da suka shafi tattaunawa da ƙasar Iran.

“Ya zuwa yanzu, Mataimakin Shugaban Amurka ba zai tashi a daren yau ba,” in ji wani mai magana da yawun fadar a ranar Alhamis.

An sa rai Vance zai tafi Switzerland a matsayin wani ɓangare na ci gaba da tattaunawa kan Iran.

“Kamar yadda mataimakin shugaban ƙasa ya bayyana a taron manema labarai, tsare-tsaren tattaunawar da za a yi ba su kammala ba, kuma tawagar ta Amurka ta kammala shirin na tashi a duk lokacin da dama ta samu. Amma tsare-tsaren waɗannan shawarwari ba su taɓa kasancewa masu sauƙi ko waɗanda ake iya hasashe ba,” in ji kakakin.

Mai magana da yawun ya ƙara da cewa Amurka na ɗokin fara tattaunawar“da zaran an samu dama.”

Gabanin haka a ranar Alhamis, Vance ya shaida wa manema labarai cewa yana shirin zuwa Switzerland, kuma za a iya fara tattaunawar mai zurfi da Iran “a karshen mako nan.”

“Ina shirin zuwa Switzerland. Amma takamaiman lokaci, ka sani, muna tunanin cewa waɗannan tattaunawar mai zurfi za su fara ne a wani lokaci a ƙarshen mako nan. Wannan shi ne shirin har yanzu. Amma hakan na iya sauyawa saboda Iran ba ƙasa ce mai sauƙin mu’amala ba wajen yin mu’amala da ita. Saboda haka, muna ƙoƙarin gano ainihin lokacin da hakan zai faru. Ina tsammanin ƙarshen mako nan, amma ban tabbatar ba,” in ji shi.

A ƙasar Iran kuma, kamfanin dillancin labarai na Tasnim ya bayyana cewa “babu abin da aka tabbatar” game da tafiyar tawagar Iran zuwa ƙasar Switzerland.

‘Mabambancin Ra’ayi’

Mojtaba Khamenei, wanda ya zama Jagoran juyin-juya-halin Musulunci na ƙasar bayan da aka kashe mahaifinsa, Ali Khamenei, a wani hararin jirgin sama na haɗin gwiwa na Amurka da Isra’ila a ranar farko ta yaƙi ranar 28 ga watan Fabrairu, ya bayyana a cikin wata sanarwa cewa, ya amince da yarjejeniyar, duk da cewa yana da “mabambancin ra’ayi”, ba tare da yin ƙarin bayani ba.

“Amma na bayar da amincewata ne saboda alƙawarin” da jami’an gwamnati suka ɗauka, haɗi da Shugaba Masoud Pezheshkian, na “kare haƙƙoƙin al’ummar Iran.”

Ya ƙara da cewa za a gudanar da “tattaunawar fuska-da-fuska” da Amurka a nan gaba, amma hakan ba “yana nufin amincewa da ra’ayin makiya ba ne.”

A ranar Juma’a, babban mai sanya hannu kan yarjejeniyar na ƙasar Iran, Mohammad Bagher Ghalibaf, ya yi gargaɗi game da duk wata saɓa yarjejeniyar a shafinsa na X: “Idan aka sami wani mummunan hali, saɓa alƙawari ko wuce gona da iri daga ɗayan ɓangaren, ba mu da shakka cewa za a bai wa maƙiya amsa mai tsanani.”

Kafin Vance ya ɗage tafiyarsa, Firaiministan Pakistan, Shehbaz Sharif, ya ɗage wata ziyara da ya shirya yi Switzerland, inda jami’an Islamabad suka tsara da farko za su karɓi baƙuncin taron sanya hannu kan yarjejeniyar.

Jami’ai biyu manya waɗanda suka nemi a sakaye sunayensu saboda girman batun, sun bayyana cewa an fasa wannan ziyarar ne saboda an riga sanya hannu kan yarjejeniyar tsakanin Iran da Amurka.