Ƙungiyar masu kiwon kare irin na Pit Bull na Afirka Ta Kudu (PBFSA) tana kira ga hukumomin gwamnati su ƙaddamar da dokokin tsaurara mallakar karnuka masu ƙarfi biyo bayan harin kisan da karnuka suka afka wa wata mai shekara 28 a Montclair, dake kudancin Durban.

Wadda lamarin ya shafa tana tafiya ne a kan hanyar gwamnati a lokacin da karnuka uku masu ƙarfi da ake ce wa pit bull suka afka mata kuma suka kashe ta. An binne ta ne a ƙarshen mako.

Kafafan watsa labaran ƙasar sun ruwaito cewa matar wadda aka bayyana cewa sunanata ne Nomathemba Kweleta tana kan hanyarta ta dawowa ne daga sayan kayan cefane a lokacin da karnukan suka kewata kuma suka far mata.

Waɗanda ke wucewa sun yi yekuwa kuma sun yi ƙoƙarin taimakawa, amma Kweleta ta mutu daga baya sakamakon raunin da ta ji.

Biyo bayan aukuwar lamarin, wani mai gadi ya harbe kare ɗaya kuma daga baya ya kashe shi cikin tausayi a wata cibiya ta hana cin zalin dabbobi.

An kama wani kare na biyu kusa da wurin daga wurin da lamarin ya auku kuma daga baya aka kashe shi cikin tausayi. Kare na ukun dai ana nemansa ruwa a jallo a lokacin rahoton.

Rahoton kafar SABC News ta ƙasar ta ba da rahoton cewa harin ya sake buɗe tattaunawa game da dokokin garuruwa da kuma nauyin da ya kamata masu karnuka suɗauka a lokacin da suka mallaki karnuka masu ƙarfi.

Rashin horaswa

Ƙungiyar PBFSA ta ce lammuran tsaro a bainar jama’a da ke da alaƙa da karnuka masu ƙarfi da rashin keɓe su da kiwonsu ba tare da ƙa’ida ba.

"Ƙarnuka masu ƙarfi, irin su, ba dabbobin gida irin ba na iyalai na yau da kullum ba ne," in ji ƙungiyar, tana mai jaddada cewa waɗannan dabbobin suna buƙatar sa-ido na msamman da kuma ƙwarewa wajen tafiyar da su.

A martani ga kiraye-kirayen da ake samu daga ƙungiyoyin masu fafatuka na neman haramta irin karnukan, in ji mai magana da yawun PBFSA Lehanda Rheeder wadda ta ce ya kamata a ɗabbaka dokar ta mayar da hankali kan fayyace gaskiya na masu karnukan da kuma bincike na doka maimakon haramtawa gaba ɗaya.

Rheeder ta ce "ya kamata a samu ƙa’ida mai tsauri game da waɗanda za su iya mallakar kare pit bull," tana mai kira ga sa-ido na garuruwa domin tantance ko waɗanda ke son mallakar karen suna da inda za su saka su da kuma horaswar da ta dace .