Tawagar ƙwallon ƙafar Turkiyya ta isa Amurka ranar Talata yayin da ta shiga mataki na ƙarshe na shirya wa gasar Cin Kofin Duniya ta shekarar 2026.

Tawagar ta sauƙa a Fort Lauderdale, Florida, inda Babban Jakadan Turkiyya a Amurka Sedat Onal da ƙaramin Jakadan Turkiyya a ƙasar, Resul Sahinol, suka tarbi tawagar. 

Tawagar za ta buga wasan sada zumunta na ƙarshe da Venezuela kafin ta mayar da hankalinta Kacokan kan gasar.

Tawagar ta Turkiyya wadda Vincenzo Montella ne koicinta, za ta koma gasar cin kofin duniya a karon farko ne tun shekarar 2002, kuma ta shiga gasar da wasu ‘yanwasa da suka haɗa da keftin Hakan Calhanoglu da Arda Guler da kuma Kenan Yildiz.

Hankali ya koma kan rukunin D

Bayan wasan sada zumunta da Venezuela, Turkiyya za ta kafa sansanin gasar cin kofinta a Mesa, Arizona, kafin wasanta na rukunin D na farko da Australia.

Tawagar ta Crescent-Stars za ta kuma kara da Paraguay da Amurka da ke cikin ƙasashe masu masauƙin baƙi yayin da suke ƙoƙarin ficewa daga wani rukuni mai wahala .

Gasar Cin Kofin Duniyar da ƙasashen Amurka da Kanada da Mexico ke karɓar baƙunci, ta faɗaɗa zuwa ta tawagogi 48, kuma za a fara ta ne ranar 11 ga watan Yuni har zuwa ranar 19 ga watan Yuli.