Iran za ta janye daga yarjejeniyar tsagaita wuta da Amurka idan Isra’ila ta ci gaba da take ta, ta hanyar kai hare-hare kan Lebanon, in ji wata majiya mai tushe a hira da Tasnim News Agency, wata kafar labarai da ke kusa da gwamnatin Iran.

Majiya ta faɗa a ranar Laraba cewa, Iran za ta janye daga yarjejeniyar idan keta haddin tsagaita wuta na gwamnatin Zionist ta ci gaba da kai hare-hare kan Lebanon.”

Majiyar ta ƙara da cewa Tehran na nazarin halin da ake ciki saboda abin da ta bayyana a matsayin “ci gaba da keta dokokin tsagaita wuta” da aka danganta da hare-hare kan Lebanon.

A cewar majiyar, Amurka ta amince da dakatar da faɗa a dukkan fuskoki, ciki har da waɗanda suka shafi kai hari kan 'mujahidan Islama' na Lebanon, a ƙarƙashin wani shiri na tsagaita wuta na makonni biyu da aka gabatar.

Masu AlakaTRT Afrika - Sharuɗɗa 10 na zaman lafiya da Amurka ta amince da su a yarjejeniyar tsagaita wuta da Iran

Duk da haka, Isra’ila ta aikata abin da majiyar ta bayyana a matsayin “bayanannen keta dokokin tsagaita wuta” tun daga daren Laraba, ta hanyar ƙaddamar da hare-haren da ta ce sun kasance masu muni kan Lebanon.

Rundunar sojin Isra’ila ta ce, ta kai hari kan fiye da wurare 100 cikin mintuna 10 a faɗin yankuna daban-daban a Beirut, da Kwarin Beqaa, da kudancin Lebanon, a cikin abin da ta bayyana a matsayin harin haɗin gwiwa “mafi girma” tun farkon farmakin da ke gudana a Lebanon.

Isra’ila ta ƙaddamar da hare-haren sama da kuma farmakin ƙasa a kudancin Lebanon tun bayan harin ƙetare da Hezbollah ta kai a ranar 2 ga Maris, duk da cewa an kafa tsagaita wuta a watan Nuwamban 2024.

Hukumomin Lebanon sun ce aƙalla mutane 1,530 ne suka mutu, kuma 4,812 suka ji rauni a hare-haren Isra’ila.