China ta zartar da hukuncin kisa kan tsohon ma'aikacin banki kan karɓar cin hancin dala miliyan 156

China ta aiwatar da hukuncin kisa kan wani tsohon jami'in ɗaya daga cikin manyan kamfanonin kula da kadarori na ƙasar, in ji kafofin yada labarai na gwamnati.

An sami Bai Tianhui, tsohon babban manajan China Huarong International Holdings (CHIH), da laifin karbar fiye da dala miliyan 156 yayin da yake ba da fifiko a saye da ba da tallafin kudi don ayyuka tsakanin 2014 da 2018, in ji kafar yaɗa labarai ta gwamnati, CCTV, a ranar Talata.

CHIH reshe ne na China Huarong Asset Management, wanda ke mayar da hankali kan sarrafa bashin da ba a biya a matsayin daya daga cikin manyan kudaden kula da kadarori a kasar.

Kamfanin Huarong ya kasance babban wajen da aka sa wa ido a yaƙin da Xi Jinping ya daɗe yana yi kan cin hanci da rashawa, inda aka taɓa aiwatar da hukuncin kisa kan tsohon shugaban kamfanin, Lai Xiaomin, a watan Janairun 2021 saboda karbar cin hanci na dala miliyan 253.

Wasu manyan jami'an Huarong ma sun fada cikin binciken yaki da cin hanci da rashawa.

A kasar China, ana yawan yanke hukuncin kisa kan laifukan cin hanci tare da jinkirin shekaru biyu, sannan a sauya hukuncin zuwa daurin rai da rai.

Amma hukuncin Bai, wanda kotu a garin Tianjin a arewacin kasar ta yanke a watan Mayun 2024, ba a dakatar da shi ba.

Ya daukaka kara kan hukuncinsa, amma a watan Fabrairu an tabbatar da hukuncin na asali.

'Matsananci sosai'

Kotun Koli ta Jama'ar China, wacce ita ce kotu mafi girma a kasar, ta tabbatar da wannan hukunci bayan sake duba shari'ar, ta ce laifukan Bai 'matsananta ne sosai', in ji CCTV.

'(Bai) ya karbi cin hanci mai yawa sosai, yanayin laifukansa sun kasance suna da matukar tsanani, tasirin zamantakewarsa ta zama abin takaici sosai, kuma dukiyar kasa da na al'umma sun yi asara mai matukar girma', in ji CCTV tana nuni da kotun.

An aiwatar da hukuncin kisa a kan Bai a Tianjin a safiyar Talata bayan ya gana da 'yan’uwa da makusantansa, in ji gidan talabijin din, ba tare da bayyana yadda aka aiwatar da hukuncin ba.

China na sanya hukuncin kisa a matsayin sirrin gwamnati, ko da yake kungiyoyin kare hakkin bil'adama na ganin ana yanke wa dubban mutane hukuncin kisa a kowace shekara a kasar.

Bai shi ne babban jami'i da aka hukunta a baya bayan nan a cikin dogon yaƙin da ake yi da cin hanci a bangaren kuɗaɗe a China.

An sanya Yi Huiman, tsohon shugaban hukumar kula da kasuwannin hannayen jari ta kasar, ƙarƙashin bincike kan cin hanci a watan Satumba.

A watan Maris, Li Xiaopeng, tsohon shugaban kamfanin bankin mallakar gwamnati Everbright Group, an yanke masa hukuncin ɗaurin shekaru 15 kan karbar cin hanci na yuan miliyan 60.

Shi ma Liu Liange, tsohon shugaban Bank of China, an yanke masa hukuncin kisa tare da jinkirin shekaru biyu a watan Nuwamban 2024 saboda karbar cin hanci jimillar yuan miliyan 121.