Dakarun tsaron Nijar (FDS) sun kashe wasu ‘yanta’adda tare da kama masu haɗa baki da masu aikata laifuka 22 a cikin mako ɗaya.

Wani harin bam da sojoji suka kai wajen garin Kokorou ya rutsa da wasu ‘yanta’adda da ke safarar dabbobin da suka ƙwace daga mutane.

Harin ya kashe biyar daga cikin ‘yanta’addan kuma binciken da aka gudanar kan gawarwakinsu ya sa an gano kayayyakin soji daga gare su, kamar yadda kamfanin dillancin labaran ƙasar ANP ya ruwaito.

Kazalika a lokacin samamen sojojin sun ƙwace shanu da suka kai 103 daga ɓarayin kuma suka mayar wa waɗanda aka sace daga gare su.

ANP ya ruwaito cewa ranar 4 watan Maris dakaru sun kashe wani ɗanta’addan a garin Torodi a yammacin ƙasar.

Dakarun Operation Niya sun ga mutumin kusa da kayayyakin soji ne a garin inda yake ƙoƙarin tattara bayanai game da abin da ake ganin shiri ne na kai hari kan dakarun tsaron ƙasar, kuma da ya yi ƙoƙarin tserewa sai a ka harbe shi, in ji ANP.

Kazalika an gano wani mutum da aka bayyana a matsayin mai kwarmata bayanai ga ‘yanta’adda a wani shingen binciken soji da ke Samira yayin da yake ƙoƙarin tattara bayanai.

Nan take aka kama shi kuma aka kashe shi, in ji rahoton na ANP.

Bincike kan kayayyakinsa ya sa an gano wayar salula ƙirar Motorola da sauran abubuwan da ke nuna alaƙarsa da aikata laifuka.

Bayan kwanaki biyu, wata tawagar jami’an tsaro ta Makalondi ta je wajen Bankata Gourmantché, inda ta lalata dukkan kayayyakin ‘yanta’adda na jigilar kayayyaki waɗanda wasu daga cikinsu za a yi amfani da su wajen haɗa bam.

Rahoton ya ƙara da cewa an ƙwace ababen haɗa bam da yawa a wannan samamen kuma nan take aka lalata su.

Kazalika rahoton ya ce dakarun Operation Garkouwa sun yi nasarar kama masu wata motar dakon mai na masu safarar mai inda suka kama litar man gas 46,000.

Baya ga ‘yanta’addan da dakarun suka yi nasarar kashewa, ayyukan da suka yi a cikin wannan lokacin ya sa dakarun sun yi nasarar kama mutum 22 ciki har da masu haɗa baki da masu aikata laifuka.