Hedikwatar Tsaron Nijeriya ta ce sojojin da ke rundunar Operation Hadin Kai sun kawar da fiye da 'yan ta'adda 30, kuma sun yi hanyar dawowar fiye da 'yan gudun hijira 'yan Nijeriya 700 a cikin makon da ya gabata.

Wannan cigaban na zuwa ne bayan an ƙara ƙaimi a ayyukan yaƙi da ta’addanci a arewa‑maso‑gabashin ƙasar.

Daraktan Harkokin Watsa Labarai na Tsaro, Maj-Gen Michael Onoja, ya shaida wa manema labarai a daren Litinin cewa, nasarorin sun biyo bayan farmaki ta amfani da bayanan sirri.

An kai farmakin ne kan Boko Haram, ISWAP da JAS, tare da haɗin-gwiwar sassan sojin sama, da ƙungiyoyin tsaro na cikin yankin.

Ya ce sojojin da ke gudanar da ayyukan kakkabe ‘yan-ta’adda cikin yankin 'Timbuktu Triangle' kusa da Kimba a ƙaramar hukumar Damboa ta Jihar Borno, sun kawar da fiye da 'yan-ta'adda 20, ciki har da wani kwamandan da ake kira da Julaibib.

An ɗauki 'Timbuktu Triangle' a matsayin mafaka mai muhimmanci da kuma hanyar zirga‑zirgar 'yan-ta'adda a arewa‑maso‑gabashin ƙasar tsawon lokaci.

Ya ƙara da cewa an samu ƙarin fafatawa a ƙaramar hukumar Gwoza ta Jihar Borno, da kuma a ƙaramar hukumar Hong da Mubi North na Jihar Adamawa, wanda ya haifar da ƙarin kawar da ɓatagari, kama masu satar mutane, ceto waɗanda aka sace, da kuma karɓe makamai da kayan soji.

Onoja ya kuma ce sojoji sun gano tare da rusa manyan wuraren tsare 'yan ta'adda guda uku a kan hanyar Damboa–Gujba na 'Timbuktu Triangle'. Kowane ɗayan waɗannan wurare na iya riƙe kusan mutum 300, yayin da aka ceto mutane 70 a aikin.

A wani lamari mai nasaba, rundunar ta taimaka wajen mayar da rukuni na biyu na kusan 'yan-gudun hijira 'yan Nijeriya 700 daga Kamaru, ta kan iyakar Banki a ƙaramar hukumar Bama ta Jihar Borno, inda aka samar da cikakken tsaro a duk tsawon aikin.

Ya kuma ƙara da cewa cigaba da ayyukan a jihohin Borno, Yobe da Adamawa ya kai ga kama masu samar da kayan aikin 'yan ta'adda da kuma karɓo makamai da harsasai.

Tsawon fiye da shekaru goma, arewa‑maso‑gabashin Nijeriya ya kasance cibiyar rikicin ta'addanci mafi muni da Boko Haram da rassanta na ISWAP ke jagoranta.

Rikicin, wanda ya fara tun 2009, ya yi sanadiyyar rasa dubban rayuka, hijirar miliyoyi, da kuma lalata hanyoyin rayuwa a jihohin Borno, Yobe, da Adamawa.

Duk da irin tasirin manyan hare‑haren soji a 'yan shekarun nan da suka rage ƙarfin 'yan-ta'adda, da kuma ƙwato wasu yankuna, harin jifa-jifa da kuma amfani da bama‑bamai na ƙirƙira suna ci gaba.

Hakan na sanya ayyukan dawo da zaman lafiya da mayar da 'yan gudun hijira cikin aminci a kangaba cikin manufofin tsaro na gwamnati.