Ma'aikatar Harkokin Wajen Amurka ta sanar a ranar Laraba cewa ta amince da sayar wa Saudiyya makamai da darajarsu ta kai kimanin dala biliyan 1.96, domin ƙarfafa tsarin kariyarta daga hare-haren sama, yayin da rikice-rikice ke ƙara tsananta a Gabas ta Tsakiya.

A cikin sanarwar, ma'aikatar ta ce wannan ciniki zai tallafa wa manufofin ƙetare da tsaron ƙasa na Amurka, tare da ƙara ƙarfafa tsaron Saudiyya, wadda Amurka ke ɗauka a matsayin babbar ƙawarta da ba mamba ba ce ta ƙungiyar NATO, kuma mai taka muhimmiyar rawa wajen tabbatar da zaman lafiya da ci gaban tattalin arziki a yankin Tekun Fasha.

An ce sayen makaman na da nufin inganta kariyar Saudiyya daga barazanar hare-haren sama, musamman jiragen yaƙi marasa matuƙi da ƙungiyoyin da ke samun goyon bayan wasu ƙasashe ke amfani da su, tare da rage dogaro da makaman kariya na Patriot, waɗanda suka fi tsada.

Daga cikin makaman da Saudiyyar ke neman saya akwai har zuwa makamai 20,000 na Advanced Precision Kill Weapon System (APKWS), waɗanda Rundunar Sojin Ruwan Amurka ta bayyana a matsayin makamai masu ƙarancin kuɗi da ke iya lalata hari tare da rage illar da ka iya shafar fararen hula.

Yarjejeniyar ta kuma haɗa da wasu kayan aikin soja kamar na'urorin harba makamai, kananan bama-bamai masu ƙarfi da injinan rokoki.

Kamfanin BAE Systems da ke jihar New Jersey ne zai kasance babban kamfanin da zai aiwatar da yarjejeniyar.

Rikici da 'yan Houthi

Matakin ya zo ne yayin da ake ganin Saudiyya na iya sake faɗawa rikici da ƙungiyar Houthi ta Yemen mai samun goyon bayan Iran, bayan da ƙungiyar ta harba makamai masu linzami kan filin jirgin saman birnin Abha da ke kudancin Saudiyya a ranar Litinin.

Harin na Houthi ya biyo bayan harin da gwamnatin Yemen ta kai kan filin jirgin saman Sanaa, da nufin dakatar da wani jirgi da ke dawowa daga jana'izar Jagoran Addini na Iran, wanda ya ɗauko tawagar Houthi. Houthi ta zargi Saudiyya da hannu a harin.

Wannan na zuwa ne yayin da Amurka ke ƙara matsa lamba kan Iran, ciki har da sake kakaba takunkumin hana zirga-zirgar jiragen ruwa, a daidai lokacin da rikici tsakanin ɓangarorin ke ƙara tsananta.

Ma'aikatar Harkokin Wajen Amurka ta ce wannan sayar da makamai ba zai yi tasiri ga shirye-shiryen tsaron Amurka ba.

Saudiyya ita ce ƙasar da ta fi kowacce a duniya karɓar makaman sojin Amurka.

A wani mataki na daban kuma, Amurka ta amince da yiwuwar sayar wa Kuwait kayan tallafin jiragen C-17 da wasu kayan aiki masu alaƙa da su, da darajarsu ta kai dala miliyan 484. Yarjejeniyar ta haɗa da kayan gyaran jirage, na'urorin sadarwa, kayan tallafin fasaha, horo da kuma ayyukan dabarun sufuri.