Emine Erdoğan ta yi jinjina ga Makarantar Maarif a ziyarar da ta kai reshenta na Afirka ta Kudu

Matar shugaban ƙasar ta Turkiyya Emine Erdoğan, ta yaba da Makarantun Gidauniyar Maarif a matsayin wata dama da Turkiyya ta buɗe wa duniya a fannin ilimi na ƙasa da ƙasa.

Emine tana tare da Shugaban Kasa Recep Tayyip Erdoğan a taron kolin shugabannin G20 da ake gudanarwa a babban birnin kasuwanci na Afirka ta Kudu, Johannesburg.

Emine Erdoğan ta halarci wasu shirye-shirye a taron kuma ta zagaya Makarantar Maarif a birnin, inda ta gana da ɗalibai da malamansu.

“A cikin irin maraba da 'ya'yanmu suka nuna mana, na ji ɗumin Afirka sosai a tattare da ni, al'adunta masu launuka da ruhinta mai ƙarfi,” in ji ta a wani rubutu da ta wallafa a shafinta na X.

“Ina fatan Makarantunmu na Maarif, waɗanda dama ce da kasarmu da buɗe wa duniya a fannin ilimi na ƙasa da ƙasa, za su ci gaba da ƙarfafa dangantaka tsakanin al'ummomi a wannan yankin mai arziki,” kamar yadda ta bayyana.

Emine Erdogan ta kuma ziyarci wani baje-kolin da ake yi a makarantar mai taken 'Sake Sarrafa Kayayyaki na Muhalli', inda ta karɓi bayani daga ɗalibai da malamai game da ayyukan da aka nuna.