A ranar Litinin, ’yanjarida masu dauko rahotannin shari’a sun kasance cikin rashin tabbas game da abubuwan da ke faruwa a shari’ar, musamman ganin cewa bukatar belin wadanda ake zargin na gaban kotun.

Tun da fari, an kawo wadanda ake zargi su shida cikin zauren kotun karkashin tsauraran matakan tsaro.

Gwamnatin Tarayya ta gurfanar da wadanda ake zargin a ranar Larabar da ta gabata a gaban Mai Shari’a Joyce Abdulmalik na Kotun Koli ta Tarayya da ke Abuja.

Babban Lauyan Gwamnatin Tarayya kuma Ministan Shari’a, Lateef Fagbemi, ne ya jagoranci masu shigar da kara.

Dukkan wadanda ake zargin sun hallara a kotun in ban da tsohon Ministan Man Fetur, Timipre Sylva, wanda aka ce yana gudun hijira.

Wadanda ake karar, wadanda suka hada da Manjo Janar Ibrahim Gana (mai ritaya), wanda aka kawo shi a kan keken guragu; kyaftin din ruwa mai ritaya Erasmus Victor, Insifekta Ahmed Ibrahim, Zekeri Umoru, Bukar Goni, da Abdulkadir Sani, sun musanta tuhume-tuhume guda 13 da ake yi musu bayan an karanta musu su.

Bayan sun musanta laifin, Fagbemi ya bukaci kotu da ta tsare su a hannun hukumar tsaro ta farin kaya (DSS) sannan a gudanar da shari’ar cikin hanzari.

Sakamakon haka, Mai Shari’a Joyce Abdulmalik ta ba da umarnin gudanar da shari’ar cikin gaggawa sannan a tsare wadanda ake karar a hannun DSS.

An dage shari’ar zuwa ranar 27 ga watan Afrilu domin fara sauraron shari’ar da kuma gudanar da ita cikin gaggawa.

Gwamnati ta shigar da tuhume-tuhume guda 13 a ranar Talatar da ta gabata a gaban kotun kan wadanda ake zargin. Har yanzu akwai sunan Sylva a cikin jerin tuhumar, ko da yake an ce ba a san inda yake ba.

Tuhumar, wadda Ofishin Babban Lauyan Gwamnatin Tarayya ya shigar kuma Daraktan Shigar da Kara na Kasa, Rotimi Oyedepo (SAN) ya sanya wa hannu, ta zargi wadanda ake karar da laifuka da suka hada da cin amanar kasa, ta’addanci, kin bayyana bayanan sirri na tsaro, da kuma safarar kudaden da ke da alaka da daukar nauyin ta’addanci.

Masu shigar da karar sun yi zargin cewa wadanda ake karar sun hada baki a shekarar 2025 “domin kaddamar da yaki da kasa don murkushe Shugaban Kasar Nijeriya,” laifin da ke da hukunci a karkashin Sashe na 37(2) na Kundin manyan laifuka (Criminal Code).

Gwamnatin Tarayya ta kara da zargin cewa wadanda ake karar suna da masaniya tun da fari kan wani shirin cin amanar kasa da ya hada da wani Kanal Mohammed Alhassan Ma’aji da sauransu, amma suka gaza sanar da hukumomi.