Firaministan Gwamnatin Falasdinu ya gana da wakilan Majalisar Dinkin Duniya da jami'an diflomasiyya don gabatar da shirin sake gina Gaza, duk da rashin tabbas kan rawar da gwamnatinsa ke takawa a makomar yankin da yaki ya ruguza.
"Zan so na yi imanin cewa nan da watanni 12, Hukumar Falasdinawa za ta fara aiki gadan-gadan a Gaza," in ji Mohammad Mustafa a ranar Alhamis, kwanaki bayan da yarjejeniyar tsagaita wuta ta fara aiki a Gaza.
Hukumar Falasdinawa (PA) ba ta da wata rawa a mulkin Gaza tun lokacin da Hamas ta karbe ikon yankin a shekarar 2007, ko da yake har yanzu tana ba da wasu ayyuka a yankin.
Shirin wanzar da zaman lafiya na Gaza da shugaban Amurka Donald Trump ya kawo bai kawar da kafa kasar Falasdinu ba, sannan kuma ya ba da shawarar bayar da damar taka rawa ga Hukumar Falasdinu da zarar ta kammala wasu gyare-gyare.
Mustafa ya ce hukumar ta PA ta tsara wani shiri na shekaru biyar ga Gaza wanda zai gudana a matakai uku, kuma yana bukatar dala biliyan 65 don sassa 18 daban-daban kamar na gidaje, ilimi, gudanarwa da sauransu.
Hadin kan siyasa da kan iyaka
Shirin ya ta'allaka ne kan abin da aka amince da shi a taron kolin kasashen Larabawa a birnin Alkahira a watan Maris din shekarar 2025, kuma Mustafa ya ce "an riga an fara shirye-shiryen horar da 'yan sanda karkashin shirin da aka kulla da Masar da Jordan."
"Manufarmu a bayyane take karara," ya shaida wa taron ministocin Falasdinawa, da shugabannin hukumomin Majalisar Dinkin Duniya, da shugabannin jami'an diflomasiyya daga ofishinsa da ke Ramallah, a yankin Gabar Yamma da Isra'ila ta mamaye.
"Za a sake gina Gaza a matsayin buɗaɗɗen waje, mai haɗin kai da bunƙasa kuma wani bangare na ƙasar Falasdin," in ji Mustafa.
Ya kuma ce ana ci gaba da tattauna wa ta fasaha tare da Tarayyar Turai kan "amintaccen ayyukan shiga nahiyar, tsarin fito, da rundunonin 'yan sanda na bai daya".
Tarayyar Turai na daga wadanda suka fi bayar da taimako ga Hukumar Falasdin.
Tsarin zai karfafa hadin kan siyasa da yanki tsakanin Gaza da Gabar Yamma, da kuma ba da gudunmawa wajen maido da ingantaccen tsarin gudanar da mulkin kasar Falasdin, in ji Mustafa.
