Vozinha, tauraron golan ƙasar Cape Verde ya samu wata karramawa da bai yi tsammani ba, inda aka laƙaba wa wata nau’in halittar ruwa mai kwanso da aka gano, sunan ɗanwasan.

Wani mai bincike ɗan Sifaniya, Jesus Ortea ne ya karrama Vozinha don yabawa da bajintar da ya nuna a gasar Kofin Duniya, inda ya taimaka wa ƙasarsa kafa tarihi a karonta na farko na shiga gasar.

An ba wa sabuwar halittar da aka gano sunan “Aldisa vozinhai”. Halittar nau’in ɗan ƙaramin dodon koɗi ne ja, wanda tsayinsa bai wuce milimita huɗu ba, wanda a baya kimiyya ba ta san da shi ba kafin Ortea ya wallafa bayani kansa.

An gano halittar ne a yankin Caribbean kusa da Havana, a Cuba, da Guadeloupe. Kuma Ortea ya daidaita lokacin wallafa bincikensa ya yi daidai da Kofin Duniya, bayan Vozinha ya zama gwarzon wasa a wasan da Cape Verde ta yi canjaras da Sifaniya, 0-0.

Ɗanwasan mai shekaru 40, ya tare ƙwallo har sau bakwai, inda ya samu yabo da jinjina da masoya ƙwallo a duniya.

Jesus Ortea ya ce ya laƙaba wa halittar sunan Vozinha don godiya ga al’ummar Cape Verde. Kuma da ma yana da alaƙa da ƙasar bayan ya samu Lambar Yabo Kan Muhalli a 2023, saboda aikinsa a nazarin halittun ruwa a tsibirin.

Ba wannan ne karon farko da Ortea ya karrama wani ɗanwasa ta wannan hanya ba. Mai binciken wanda farfesa ne a jami’ar University of Oviedo, a 2019 ya saka sunan tsohon ɗanwasan Real Madrid kuma golan Costa Rica, Keylor Navas.

Kafin wannan, Vozinha ya samu shuhura sakamakon ƙoƙarinsa a gasar. Ya samu ƙaruwar mabiya a Instagram daga 50,000 kafin Cape Verde ta fara wasa, zuwa miliyan 28.5 a lokacin buga wannan labari.