Jiragen yaƙi na Amurka da dama sun faɗi a Kuwait a safiyar Litinin, amma ma'aikatansu sun tsira, in ji ma'aikatar tsaron Kuwait, yayin da Iran ke ci gaba da kai hari a rana ta uku a yankin Gulf na Gabas ta Tsakiya.
“Jiragen yaƙi na Amurka da yawa sun faɗi a yau da safe. Mun tabbatar cewa duka ma'aikatan sun tsira,” in ji kakakin ma'aikatar tsaro a cikin wata sanarwa, inda ya ƙara da cewa ana binciken sanadin faruwar lamarin.
“Hukumomi nan take sun ƙaddamar da ayyukan bincike da ceto, inda suka ceto ma'aikatan suka kai su asibiti domin a tantance su da kuma ba su kulawa, “ in ji sanarwar.
A cewar wakilin TRT World a Tehran, gidan talabijin na gwamnatin Iran ya ce an kakkaɓo wani jirgin F-15 na Amurka a Kuwait bayan an harbo shi da tsarin tsaron sararin samaniya.
Tun da farko a ranar Litinin, wasu bidiyoyi da suka yadu a kafafen sada zumunta sun nuna abin da ake zaton jirgin yakin F-15 na Amurka ne yana faduwa a Kuwait, yayin da hukumomi ba su fitar da cikakken tabbaci game da bayanan jirgin ba.
Bidiyon, wanda aka yaɗa shi sosai a kafafen sada zumunta, yana nuna abin da ake tsammani jirgin yaƙi ne, wanda ake ganin F-15 ne na Amurka ne, yake faɗuwa.
Bidiyon ya haɗa da hotuna da ke nuna wani matukin jirgi, wanda ya sauka da balanbalan, inda aka kai shi cikin motar farar-hula.
