Da alama Real Madrid ta yi nasarar sayen ɗan wasan gaba na gefen dama, Yan Diomande, wanda manyan ƙungiyoyi ke nema ruwa-a-jallo, bayan da Paris Saint-Germain ta janye daga fafatawar nemansa.

Bayan ya yi fice a gasar Bundesliga tare da taka rawa sosai a Gasar Kofin Duniya, an fara alaƙanta ɗan wasan ɗan Côte d’Ivoire mai shekara 19 da komawa Liverpool a farkon kasuwar saye da sayar da 'yanwasa. Sai dai daga baya wakilansa suka bayyana cewa ya fi son komawa Paris.

Amma ƙwararren ɗanjaridar kasuwar musayar 'yanwasa, Fabrizio Romano, ya ruwaito a ranar Litinin cewa Real Madrid ce yanzu ke kan gaba wajen ɗaukar ɗanwasan a wata yarjejeniya da ake sa ran za ta haura Yuro miliyan 100.

A cewar Romano, Diomande zai tafi Madrid a cikin wannan makon domin yin gwajin lafiya kafin ya sanya hannu kan kwantiragin shekara biyar.

Yan Diomande ya ja hankalin manyan ƙungiyoyi ne bayan ya yi fice a RB Leipzig, inda ya nuna ƙwarewa wajen tsaron baya, karfin jiki da iya sarrafa ƙwallo duk da ƙuruciyarsa.

Idan wannan cinikin ya tabbata, zai kasance ɗaya daga cikin manyan sayayyar 'yan wasa da Real Madrid ta yi a baya-bayan nan, yayin da ƙungiyar ke ci gaba da neman matasan taurari da za su jagoranci makomarta.

Ana kallon ɗan wasan na Côte d’Ivoire a matsayin ɗaya daga cikin manyan hazikan matasan Afirka da suka fara samun karɓuwa a manyan gasannin Turai.