Kamfanonin Turkiyya sun sanya hannu kan kwangilolin fitar da kayayyaki na kusan dala biliyan 8 a cikin kwanaki uku na farko na baje-kolin tsaro da sararin samaniya na SAHA 2026, in ji shugaban SAHA Istanbul, Haluk Bayraktar a ranar Juma'a.
"Ina taya dukkan mambobinmu na SAHA Istanbul murna da wannan nasarar da muka samu," in ji Bayraktar a wata sanarwa ta shafin X.
“A matsayin ƙasa, mun cim ma nasara mai tarin yawa a SAHA 2026,” ya ƙara bayyanawa.
Kamfanonin Turkiyya suna baje-kolin sabbin kayayyakinsu na zamani a SAHA 2026, wanda ke gudana daga 5-9 ga Mayu a Cibiyar Baje-Kolin Istanbul.
Babban rukunin masana'antar tsaro, jiragen sama da sararin samaniya na Turkiyya da Turai ne suka shirya taron, inda kamfanin dillancin labarai na Anadolu ke aiki a matsayin abokin hulɗarta na sadarwa na duniya.
Shugaban TEI na da aniyar faɗaɗa fitar da fasahar injinan jiragen sama
Kamfanin Tusas mai samar da injinan jiragen sama, (TEI) na Turkiyya na faɗaɗa rawar da yake takawa a cikin harkokin samar da kayayyakin jiragen sama a duniya yayin da yake ƙara himma wajen haɓaka fasahar injinan cikin gida, in ji shugaban kamfanin.
Da yake tattaunawa da kamfanin dillancin labarai na a wajen baje-kolin tsaro na ƙasa da ƙasa na SAHA da aka yi a Istanbul, Mahmut Faruk Aksit ya ce TEI na da rawa biyu a masana'antar sufurin jiragen sama: samar da fasahohin injina masu mahimmanci ga Turkiyya da tallafawa shirye-shiryen injinan jiragen sama na duniya ta hanyar samar da sassa da na'urori.
"Ɗaya daga cikin manyan ayyukanmu shi ne samar da sassa da na'urori."
Ya ce fitar da kayayyaki na TEI ya ƙaru sosai.
"A bara, mun kusa kai dala biliyan ɗaya a fitar da kayayyaki, kuma ana amfani da duk waɗannan sassan a cikin ayyukan samar da sama da 50," in ji shi.
