An janye umarnin kullewar hedikwatar Ma’aikatar Tsaron Amurka (Pentagon) bayan bincike ya nuna cewa gargaɗin da aka samu kan wasu abubuwa masu haɗari ƙarya ne, kamar yadda kafafen yaɗa labarai na Amurka suka ruwaito.

Tun da farko, an sanya ginin cikin yanayin kulle bayan jami’an kashe gobara da na ceto suka sanar da cewa suna binciken wani rahoto game da yiwuwar kasancewar abubuwa masu haɗari a cikin ginin.

Tashar CNN ta ruwaito, tana ambaton majiyoyi da ba a bayyana sunayensu ba, cewa jami’an agajin gaggawa sun isa wurin sanye da cikakkun abin rufe fuska na kariya daga iskar gas da kuma kayan kariya daga sinadarai masu haɗari.

A cikin wata sanarwa ta imel, kakakin Pentagon, Sean Parnell, ya ce:

“Pentagon na da ingantattun tsare-tsare da na’urori da ke tabbatar da tsaron ginin da mutanen da ke cikinsa.

“Waɗannan tsare-tsaren sun gano wata matsala da ta shafi ingancin iska, wanda ya sa aka ɗauki matakan kariya har sai an gano hakikanin abin da ya faru.”

Ya ƙara da cewa ma’aikatar ta aiwatar da ƙa’idojin kariya na yau da kullum, ciki har da umarnin mutane su ci gaba da zama a wuraren da suke a yankunan da abin ya shafa.

Rahotanni sun ce an kulle bene na biyu zuwa na biyar na ginin, tare da wasu hanyoyin shiga da fita, yayin da ake gudanar da bincike.

Pentagon, wanda gini ne mai siffar bangarori biyar kuma ɗaya daga cikin manyan gine-ginen ofisoshi a duniya, ya taba fuskantar hari a lokacin hare-haren 11 ga Satumban 2001 da ƙungiyar Al-Qaeda ta kai a Amurka.

Bayan kammala bincike, an tabbatar da cewa babu wata barazana ta gaske, lamarin da ya sa aka ɗage kullewar ginin.