A Nijeriya farashin man fetur ya tashi daga N175 zuwa N1,300 tsakanin watan Mayun shekarar 2023 zuwa watan Mayun 2026, wani matakin da ya kai kashi 643 cikin 100 a cikin shekaru uku, kamar yadda jaridar The PUNCH ta Nijeriya ta ruwaito.
Jaridar ta ce bincikenta ya nuna cewa hawhawar farashin man fetur ɗin ya faru ne sakamakon cire tallafin man fetur da Shugaba Bola Tinubu ya yi jim kaɗan bayan an rantsar da shi ranar 29 ga watan Mayun shekarar 2023.
Kazalika matakin da gwamnatinsa ta ɗauka na dakatar da tsarin ƙayyade farashin dala ya dagula lamarin, inda ya sa farashin man da a wancan lokacin ake shigar da shi ƙasar ne ya tashi fiye da abin da ‘yan Nijeriya da dama za su iya saya.
Bayan shekaru uku, farashin litar man fetur a gidajen mai ya yi tashin gauron zabi, inda ake sayar da shi tsakanin N1,300 zuwa N1,400, dangane da wurin da gidan mai yake.
Tashin farashin na baya bayan nan ya faru ne daga kimanin N800 da ake sayar da litar man cikin ‘yan watannin da suka gabata zuwa N1,300 sakamakon tashin hankalin da ake yi a Gabas ta Tsakiya, lamarin da ya haifar da tsaiko a harkar samar da mai a duniya sakamakon rufe Mashigar Hormuz.
Idan za a iya tunawa a lokacin rantsuwar kama aikin Shugaba Tinubu ne ya sanar da cewa “tallafin mai ya tafi.”
Wannan ya janyo tashin farashin mai nan take daga N175 ko N200 zuwa sama da N500 kan kowace lita. Kamfanin mai na Nijeriya NNPC, wanda shi kaɗai ne yake shigar da man fetur a lokacin, shi ne ya jagoranci ƙarin farashin man ta hanyar ɗaga farashinsa a gidajen mansa.
