Majalisar Wakilan Nijeriya ta ce ana samun ƙaruwar zamba ta POS da ayyukan kirifto ba bisa ƙa'ida ba
Olufemi Bamisile, Shugaban kwamitin, wanda ke jawabi a wani zaman bincike ya ce ayyukan masu ruwa da tsaki sun nuna manyan giɓi a fannin harkokin kudi na dijital na Nijeriya.
Kwamitin wucin gadi na Majalisar Wakilai kan Tasirin Tattalin Arziki, Ka'idoji da Tsaro ga Amfani da Kuɗin Crypto da Ayyukan POS a Nijeriya ya nuna damuwa game da karuwar zamba mai alaƙa da amfani da POS da kuma ƙaruwar kutse da ayyukan kirifto marasa lasisi ke yi a fannin kuɗaɗe.
Olufemi Bamisile, Shugaban kwamitin, wanda ke jawabi a wani zaman bincike ya ce ayyukan masu ruwa da tsaki sun nuna manyan giɓi a fannin harkokin kudi na dijital na Nijeriya.
A cewar Mista Bamisile, Kwamitin ya sami rahotanni da dama na rashin daidaito da rauni a tsarin amfani da POS.
"Muna damuwa kan ƙaruwar zamba da ke tattare da ayyukan POS. Masu amfani da shi da babu bayanansu da cibiyoyin POS na bogi suna ci gaba da sanya 'yan ƙasa cikin haɗarin da za a iya magancewa."
"Akwai zarge-zarge da bayanai masu inganci da ke nuna cewa wasu masu gudanar da POS yanzu suna shiga ayyukan da suka shafi kirifto waɗanda ba su da lasisi. Wannan ya tayar da hankali game da hana halatta kudaden haram, kuɗaɗen ta'addanci, sahihancin bayanai da kuma amfani da kayan aikin da aka tsara don ayyukan biyan kuɗi na asali ba bisa ƙa'ida ba."
Shugaban Kwamitin ya kuma bayyana cewa an sanar da kwamitin game da yin rijistar kamfanonin bogi a Hukumar Harkokin Kamfanoni, wadanda wasu daga cikinsu ake zargin suna amfani da Lambar Shaidar Kasa (NIN) da Lambar Tabbatar da Banki (BVN) na 'yan kasa marasa tabbas don bude asusun ajiya da kuma halatta kudaden haram ta hanyar hanyoyin POS da ba a tabbatar da su ba.
Paul Okafor, Shugaban Ƙungiyar Biyan Kuɗi ta Dijital da Masu Amfani da POS ta Nijeriya (ADPPON), ya kuma yi gargaɗin cewa tsarin amfani da POS a ƙasar ya kai wani mawuyacin hali, inda zamba ke ƙaruwa zuwa matakan da yanzu ke zama barazana kai-tsaye ga tsaron ƙasa.
Mista Okafor ya bayyana cewa saurin fadada masana'antar ya wuce karfin dokoki, wanda hakan ya bar gibin da masu aikata laifuka ke kara amfani da shi.
Ya lura cewa yayin da adadin masu gudanar da POS ya karu daga 50,000 a shekarar 2017 zuwa fiye da miliyan 2.3 a yau, karfin kulda da tsarin ya ƙaru ne da ƙasa da kashi 10 cikin 100 kacal.
Ya kara da cewa masu aikata laifuka suna ƙara amfani da masu POS a matsayin wuraren samun kudi don biyan kudin fansa da kuma kudaden haram.