Shugaban Amurka Donald Trump ya ce amincewa da yarjejeniyar makamashin nukiliya ta farar-hula tsakanin Amurka da Saudiyya na da sharadin cewa Saudiyya ta shiga Yarjejeniyar Abraham, wadda ta shafi daidaita hulɗar diflomasiyya da Isra'ila.

Ya kuma jaddada cewa ba za a ba da izinin wadatar da uranium (uranium enrichment) ba.

Trump ya bayyana cewa Amurka da Saudiyya sun cim ma yarjejeniya kan makamashin nukiliya na farar-hula, wadda za ta bai wa Saudiyya damar gina tashoshin nukiliya ta amfani da fasahar Amurka. Sai dai ya ce shirin zai kasance ne kawai domin amfani na zaman lafiya, ba na soja ba.

A wani saƙo da ya wallafa a shafinsa na Truth Social, Trump ya ce, "Yarjejeniyar makamashin nukiliya ta farar hula (ba za a yi wadatar da uranium ba) za a amince da ita, amma hakan gaba ɗaya ya dogara ne kan Saudiyya ta shiga Yarjejeniyar Abraham."

Ya ƙara da cewa Amurka ba ta adawa da cibiyoyin makamashin nukiliya na farar hula muddin ba sa wadatar da uranium.

Tun da farko, Saudiyya ta sha bayyana cewa ba za ta shiga Yarjejeniyar Abraham ba sai an cimma matsaya kan wata hanya da za ta kai ga kafa ƙasar Falasdinu.

Amurka ce ta jagoranci ƙulla Yarjejeniyar Abraham a wa'adin mulkin Trump na farko domin ƙarfafa alaƙa tsakanin Isra'ila da ƙasashen Larabawa. Ya zuwa yanzu, Haɗaɗɗiyar Daular Larabawa (UAE) da Bahrain da Morocco sun shiga yarjejeniyar, yayin da shigar Sudan ke jiran kammalawa.