Shugaban Amurka Donald Trump ya tabbatar cewa an kama wani mai harbi bayan wani gagarumin kuste na tsaro a wajen Liyafar Cin Abinci da Wakilan Kafofin Watsa Labarai a fadar White House.

Wani jami'in FBI ya ce wani mutum mai ɗauke da bindigar farauta ya yi ƙoƙarin yi wa jami’an tsaro kutse a wajen taron, inda ya harbi wani jami'in Tsaron Farin Kaya.

Jami'in ya tabbatar cewa jami'in da aka harba 'yana cikin koshin lafiya' kuma bai ji rauni ba a yayin musayar wutar da aka yi.

An hanzarta fitar da shugaban daga wajen bayan harbin bindiga da jerin sauti masu ƙarfi suka katse taron shekara-shekara na 'yan jarida da jami'an gwamnati.

An kuma fitar da sauran jami’an gwamnati, yayin da mafi yawan mahalarta kusan 2,600 suka ɓuya a ƙarƙashin tebura, sannan ma'aikata suka tsere daga dakin taron.

Bayan an mayar da shi wuri mai aminci, Trump ya yi amfani da shafin Truth Social don yaba wa martanin jami'an tsaro na tarayya.

'Jami’an Tsaron Farin Kaya da hukumomin tsaro sun yi aiki mai kyau ƙwarai. Sun yi sauri kuma sun yi jarumta. An kama mai harbin,' in ji Trump.

Ya kuma tabbatar da cewa Uwargidan Shugaban Ƙasa, da Mataimakin Shugaba, da mambobin Kwamitin Majalisa (Cabinet) da suka halarta duk suna cikin 'cikakkiyar lafiya'.

Duk da yake Shugaban ya bayar da shawarar cewa masu shirya taron su 'CI GABA DA GUDANAR DA SHI', ya bayyana cewa shawarar ƙarshe tana hannun hukumomin tsaro.

'Ko mai dai menene wannan shawara, daren zai bambanta sosai daga yadda aka tsara shi, kuma za mu sake yin sa,' in ji shi.

Jami’an FBI da na tsaron Secret Service suna ci gaba da bincike kan dalilan wanda ake zargi da yin harbin, da yadda mutumin da ke ɗauke da makami ya samu shiga cikin yanki mai tsaro na Washington Hilton.