'Yan Democrat sun ƙwace rinjaye a duka majalisun dokokin Amurka biyu, a wani gagarumin sauyi da ya biyo bayan zaɓukan rabin wa'adin mulki, inda suka yi wa Shugaba Donald Trump da jam'iyyarsa ta Republican babban koma-baya.
Sakamakon zaɓen ya bai wa 'yan Democrat damar kawo cikas ga ajandar dokokin Trump a sauran shekaru biyun da suka rage masa na mulki.
Masu kaɗa ƙuri'a sun nuna rashin amincewarsu da gwamnatin Trump kan tsadar rayuwa da haraji, da kuma yaƙin da take yi da Iran, wanda ya ƙara janyo tashin farashin man fetur.
Trump ya ce a shirye yake ya amince da sakamakon zaɓen tare da yin aiki tare da 'yan Democrat. Sai dai jim kaɗan bayan haka, ya wallafa wani hoto a shafukan sada zumunta na wata jar hula mai ɗauke da kalmomin "KUJERAR NAƘI".
'Yan Democrat sun yi nasara a yankunan da 'yan Republican suka fi ƙarfi
'Yan Democrat sun samu gagarumar nasara a jihohin da a baya suka kasance sansanonin 'yan Republican, ciki har da Kansas da Iowa da Texas da South Carolina da North Carolina da kuma Ohio.
A Kansas, faston ɗariƙar Methodist, Adam Hamilton, ya kayar da sanatan Republican mai ci, Roger Marshall. Hakan ya sa ya zama sanatan Democrat na farko da jihar ta samu tun shekarar 1932.
A Iowa kuma, 'yan Democrat sun samu nasarar farko ta lashe kujerar Majalisar Dattawa tun shekarar 2008.
Texas ta ba da mamaki, inda James Talarico ya kayar da ɗan takarar sanata da Trump ke marawa baya, yayin da Gina Hinojosa ta doke Gwamna mai ci na jam'iyyar Republican, Greg Abbott.
'Yan Democrat sun kuma ƙara ƙarfafa matsayinsu na samun rinjaye a Majalisar Wakilai, ta hanyar ƙwace wasu mazaɓu daga hannun 'yan Republican a jihohi daban-daban, ciki har da Pennsylvania da New Jersey da Kentucky da Arizona da North Carolina.
Jeffries ya sha alwashin magance tsadar rayuwa da cin hanci
Shugaban 'yan Democrat a Majalisar Wakilai, Hakeem Jeffries, ya sha alwashin ɗaukar matakan rage tsadar rayuwa da dawo da tallafin kiwon lafiya da aka rage, tare da gudanar da bincike kan zarge-zargen cin hanci da rashawa.
"Za mu yi iya ƙoƙarinmu wajen rage tsadar gidaje da kayayyakin masarufi da kuma man fetur," kamar yadda ya shaida wa magoya bayansa a Washington.
Jeffries, wanda ka iya zama Ba'amurke ɗan Afirka na farko da zai jagoranci Majalisar Wakilai, ya kuma yi alƙawarin kafa shugabanci mai gaskiya da riƙon amana.
"Wannan zaɓe ne na kawo sauyi," in ji shi. "Muna buƙatar kawo sauyi. Abubuwa sun lalace."
A halin yanzu, 'yan Democrat za su samu damar gudanar da bincike kan manufofin Trump game da shige da fice da yaƙin Iran, da kuma ƙalubalantar naɗe-naɗen manyan jami'an shari'a da na gwamnati.
Sai dai 'yan Republican sun riƙe wasu muhimman muƙamai a Florida, inda ɗan takarar da Trump ke marawa baya, Byron Donalds, ya lashe zaɓen gwamna, yayin da Ashley Moody ta riƙe kujerarta ta sanata.
Duk da haka, jimillar sakamakon zaɓen ya nuna gagarumin sauyi a yadda aka raba ikon siyasa a Washington.
