Nijeriya na tattaunawa da Amurka bayan barazanar Shugaba Donald Trump na daukar matakin soji kan zargin cewa ana azabtar da Kiristoci a kasar, in ji Ministan Harkokin Wajen Nijeriya AFP a ranar Litinin.

"Abin da muke tattaunawa shi ne yadda za mu yi aiki tare don magance kalubalen tsaro wadanda suka shafi duniya baki daya," in ji Minista Yusuf Tuggar a wata hira a babban birnin tarayya Abuja.

A farkon watan Nuwamba Trump ya ce ya bukaci Hedikwatar Tsaro ta Amurka, Pentagon ta tsara wata yiwuwar shirin kai hari a kasar wadda ta fi yawan jama'a a Afirka, saboda 'yan ta'adda suna "kashe Kiristoci sosai."

Da aka tambaye shi ko yana ganin Washington za ta tura sojoji su kai farmaki, Tuggar ya ce: "A'a, bana tunanin haka."

'Tattaunawar ta samu ci gaba'

"Domin muna ci gaba da tattaunawa, kuma kamar yadda na ce, ana samun ci gaba a tattaunawar. Ta wuce wannan mataki."

Shugaban Amurka ya ce addinin Kiristanci na fuskantar "barazanar kawar da shi" a kasar ta Yammacin Afirka, inda ya yi gargaɗi cewa idan Nijeriya ba ta dakatar da kashe-kashen ba, Amurka za ta kai hari kuma "zai kasance cikin sauri kuma mai tsanani."

Nijeriya, wacce ke da mutane kimanin miliyan 230, an raba ta kusan daidai tsakanin kudu mai rinjaye Kiristoci da arewa inda Musulmai suke da rinjaye.

Ta'addanci a Nijeriya yana shafar Kiristoci da Musulmai duka, ba tare da bambanci ba.