Nigeria President Bola Ahmed Tinubu don reveal di next phase of im economic agenda as im dey meet with global investors for Paris, France.

Di President talk about im plans during one high-level meeting with big international investment firms. Im yarn say from 2027 go forward, im go focus on making di reforms wey don start stronger, and make sure say policy execution no dey change anyhow.

One of di investors bin ask am about wetin im government go do afta 2027. Tinubu tell am say im go continue di reforms and maintain discipline for governance.

Di statement wey im Special Adviser on Information and Strategy, Bayo Onanuga, release quote di President say "di main tin na to make sure policy dey stable and execution dey careful so dat all dese big changes go turn to real benefit for every Nigerian".

Tinubu leave Nigeria on Sunday for three-nation diplomatic trip. Im use di meeting to explain im government big economic reform programme, wey im say na to remove all di wahala wey dey inside di economy, make macroeconomic indicators stable, and lay good foundation for growth wey go reach everybody.