Aliko Dangote, wey be Africa richest man and founder and president of Dangote Group, talk say foreign interests dey work against Africa development.

Di billionaire talk dis one on Thursday for Investing for Africa forum, wey hold for di side of di ongoing IMF-World Bank spring meetings for Washington, DC.

As e dey call for stronger regional integration, di philanthropist dismiss di idea say single African market go work well if regional market no dey function.

“Africa free trade go work, but e go only work when di regional markets dey function,” di industrialist talk.

“Di regional markets must work first before you move forward because di dotted points of all dese regional markets no dey work.

“You no fit get one single market. And you know, you must remember say plenty international interest dey, I sorry to talk am, dis international interest no want see Africa grow.”

Dangote talk say Africa never get any refinery for “donkey years”, e note say “plenty interests no dey allow” refinery projects for oda countries to happen.

Concerning attracting foreign capital to di continent, di entrepreneur stress say foreign investment dey follow risk perception.

E talk say Africans must first invest for their continent before foreign investors fit enter.
“Foreigners go invest. But foreigners sef smart people. Anyting you talk about risk, dem want look am ten times. So how we fit reduce di risk?.

Di only way to reduce di risk na make we Africans lead and show say dat risk na perceived risk, no be real risk,” Dangote talk.

“If I no dey invest for Africa, no way I go convince anybody outside di continent to come and invest. So, I must now show say dis risk na just perceived risk.”