Abike Dabiri-Erewa, di chairperson of Nigerians in Diaspora Commission (NIDCOM), don talk say Nigeria go begin bring back dia citizens wey dey stranded for Middle East once "di airspace open".

Dabiri-Erewa yarn dis matter on Tuesday while she dey react to complaints from one Nigerian wey dey stranded for Qatar.

Dis one come as di Middle East dey hot well-well afta Iran launch attack to reply wetin dem call US missile activities wey dey happen from one base for Qatar.

Since February 28 when di wahala start, Iran don dey exchange attacks with Israel and US.

Before di attacks begin, plenty countries don warn dia citizens make dem comot from dangerous areas for dat region.

Nigeria too give warning on di first day of di wahala, saying dem dey watch di "situation wey dey change and wey dangerous".

Di next week, one plane carry French citizens from Oman and Egypt land for Paris on March 4, wey be di first among plenty repatriation flights wey France organise.

Some students also return to Italy afta dia government comot dem from Dubai.

As Dabiri-Erewa dey answer di complaints from Nigerians for Middle East, she yarn say "di skies no safe for fly now".

"By God grace, one flight come from UAE go Lagos two days ago, just before anoda strike and closure of di airspace.

"Once di airspace open, di multi-agency federal government team wey dey handle crises and evacuation dey standby.

"We dey pray for una and all our pipo for di affected countries."

Nobody know exactly how many Nigerians dey stranded for Iran or oda Middle East countries wey di ongoing wahala don affect.