Di Minister of Education, Dr Tunji Alausa, don reveal say Federal Government go do one comprehensive nationwide household survey to get more correct figure for Nigeria out-of-school children.

As e acknowledge say di old estimates wey dey exist no longer show di true situation.

While e dey talk on Wednesday for 2026 Annual Education Summit of Education Correspondents Association of Nigeria for Abuja, Alausa

say Federal Ministry of Education dey partner with National Bureau of Statistics to generate reliable data wey go guide policy decisions and interventions for di sector.

Di minister admit say di estimates of out-of-school children wey plenty people dey quote need to be updated, and e stress say government dey committed to replace assumptions with credible, evidence-based statistics.

According to am, di nationwide household survey go give clearer picture of di size and distribution of di problem, wey go enable government to design more targeted interventions to improve access to education.

Dr Alausa note say although government don succeed to return more than one million out-of-school children back to classroom over di past two years, getting accurate data still dey very important to measure progress and tackle di problem well well.

Estimates put di country out-of-school children between 15 million and about 20 million.

Alausa say President Bola Tinubu administration dey committed to evidence-based policymaking, and e stress say access to accurate data go empower both di media and citizens to demand more accountability from public officeholders.

Di minister talk say journalists must move beyond routine event coverage to investigative reporting wey go highlight gaps for di education sector and track government performance using verifiable evidence.

According to am, quality journalism wey credible data dey back am no go only strengthen accountability but also improve education outcomes across di country.