Pentagon dey prepare to remove about 200 US soldiers from Nigeria wey dem send dis year to help fight Islamist militants, according to New York Times.

American and Nigerian officials tell di publication say di small number of soldiers wey dem send to West Africa don get big results.

But small teams of trainers and intelligence analysts go still remain after di main group leave by late September, according to di NYT report wey dem publish on Thursday, based on wetin US military officials talk.

Di report note say American officials describe di deployment of soldiers in Nigeria as example wey dem fit use for future operations for Africa.

Last month, Dagvin Anderson, commander of US Africa Command (AFRICOM), announce say US don pull out many of dia soldiers from Nigeria after di May operation wey kill Abu-Bilal al-Minuki, wey be second-in-command for ISIS, for Lake Chad Basin.

Anderson say di operation seriously weak ISIS leadership for Nigeria and worldwide.
Dis one come just few weeks after US and Nigeria hold dia second round of talks for Washington under joint working group wey focus on protecting Christian communities for Nigeria Middle Belt.

Dem form di working group because President Donald Trump don name Nigeria as country of particular concern (CPC) over allegations of Christian genocide. Those allegations make US send military intervention to di country.
But insecurity still dey increase.