For di spirit of togetherness, one mosque, Al-Ahfad for Nassarawo area for Gombe state wey dey north east Nigeria, bin invite Christian and Muslim leaders on Tuesday to chop break fast together for Ramadan, di one wey dem dey call 'Iftar.'

Di Chief Imam of di mosque, Dr. Umar Dokaji, tok say dis meeting happen at di time wey both Muslims and Christians dey dia fasting period.

According to am, di way dia fasting dey happen together at di same time go help make di two religious groups dey close. E add say di iftar na to make peace better, "especially now wey Nigeria dey face plenty wahala wey connect to religion and tribe."

"Dis one dey happen at di time wey some pipo dey accuse dem sey dem dey persecute pipo becos of religion, and terrorist wahala dey scatter some part of di kontri.

"So I believe say dis kind meeting go help make di two main religious groups for dis kontri dey together, and e go help make we no see deadly religious wahala for di biggest black kontri for earth," im tok.

While im dey pray for di kontri, di imam tok say we must support pipo wey no get strong back, and im talk say di only tin wey go solve di wahala for Nigeria na justice.

Di Christian leaders wey dem invite, dey very happy and tank di mosque for dis good heart, and dem tok say dis one show sey Gombe pipo sabi understand each oda well-well.

Reverend Abare Kalla wey tok on behalf of di Christian invitees, talk say dis meeting go make Muslim and Christian wey dey stay for di area dey close.

"Make I tell you, I remember how for Nasarawo, Christian and Muslim communities bin settle one problem about worship place wisket and dem do am without wahala. Dis one na tin wey I go always proud of till di end of time," im tok.